नगरपालिकां विवादास्पद कलेज संचालन याइगु

येँ – चाँगुनारायण नगरपालिकां विवादय् लानाच्वंगु चाँगुनारायण इन्जिनियरिंग कलेज संचालन याइगु जूगु दु । नगरपालिकाया नकतिनि क्वचाःगु प्यक्वःगु नगरसभां विवादास्पद इन्जिनियरिंग कलेज थम्हं संचालन यायेगु निर्णय याःगु खः । नगरसभाय् उगु कलेज नगरपालिका थःपिंसं हे संचालन यायेगु कथं कार्ययोजना तकं पारित यायेधुंगु नगरपालिकाया प्रमुख सोमप्रसाद मिश्रं जानकारी बियादिल ।

वय्कलं कलेजया पूर्व संचालकलिसे कलेज नगरपालिकायात हस्तान्तरण यायेत पत्राचार यायेगु खँ न्ह्यथँसें कलेजया दक्वं स्वामित्व आः नगरपालिकां ग्रहण यायेगु जुइ धयादिल । थीथी विधेयक पारित यासें क्वचाःगु नगरसभां नगरपालिका क्षेत्र दुनेया पर्यटन विकासया निंतिं थीथी परियोजना संचालन यायेगु प्रस्ताव नं पारित याःगु दु ।

अथे हे नगरसभां चाँगुनारायण नगर पालिका वडा नं. ४ य् सछिपि क्षेत्रफलय् अन्तर्राष्ट्रिय खेलकुद मैदान दयेकेगु प्रस्ताव नं पारित याःगु खःसा नगरपालिका क्षेत्र दुनेया बन्द जुयाच्वंगु प्राकृतिक स्रोत व खानी संचालनया निंतिं माःगु व्यवस्था यायेत नं नगर कार्यपालिकायात निर्देशन बिउगु दु ।

उगु नगरसभां विनियोजित ऐनयात संशोधन यायेत दयेकूगु विधेयक, शिक्षा ऐन २०७४ संशोधन यायेत दयेकूगु विधेयक, कर व गैर कर राजस्व लगे यायेगु व म्हयेगु विधेयक लगायत नं पारित याःगु खः ।