
येँ – नेपाली कांग्रेसया नेता प्रकाशमान सिंहं कांग्रेसया नेतृत्व आः स्वनिगलं यायेमाःगु खँ धयादीगु दु । म्हिगः नेपाली कांग्रेस नागार्जुन नगर समितिं ग्वसाः ग्वःगु बधाई लिसें भिंतुना ज्याझ्वलय् थःगु बिचाः तसें नेता सिंहं उगु खँ धयादीगु खः ।
वय्कलं कांग्रेसया झिंप्यक्वःगु महाधिवेशनय् थम्हं सभापति पयद् उम्मेदवारी बीगु खँ धासें झिंस्वक्वःगु अधिवेशनय् थम्हं उम्मेदवारी मबिसे रामचन्द्र पौडेल व शशांक कोइरालायात ग्वाहालि यानागुलिं आः वय्कःपिंसं थःत ग्वाहालि यायेमाःगु दावी यासें धयादिल, ‘त्याग जक धयां जिउ ला ? झिंस्वक्वःगु अधिवेशनय् जिं रामचन्द्र पौडेलयात त्वःता बियागु खः, जिं न्हापा महामन्त्री त्याकागु खः, विपिया काय् महामन्त्री दने धाः– बलय् जि हे शशांक कोइरालाया प्रस्ताव जुयागु खः ।’
थुगुसी येँनं कांग्रेसया सभापति जुइमाः धासें वय्कलं धयादिल, ‘आः तक येँनं सु पार्टी सभापति जूगु दु ? छु जिपिं न्ह्याबलें मेपिनिगु झोला जक कुबिया जुइमाःगु खःला ? जि थुगुसीया महाधिवेशनय् गुगुं नं हालतय् सभापतिइ ल्वायेगु जुइ, आः कांग्रेसय् येँनं सभापति बी ।’
उकथं हे नेता सिंह उलिमछि दँ स्वनिगः पिनेया नेतात जक पार्टीया सभापति जूगुलिं थुगुसी येँयात नेतृत्व बीकेमाःगु खँ धासें धयादिल, ‘वःदँमछि येँनं पिने नेतृत्व यात आः पाः येँया खः ।’ वय्कलं वर्तमान सभापति लिसें प्रधानमन्त्री शेरबहादुर देउवां ज्या याये मफुगु खँ धासें जनतां कांग्रेयात मालाच्वंगुलिं नं थःत ग्वाहालि यायेत इनाप यानादिल ।
थःत नेता लिसें कार्यकर्तातय्सं नं न्ह्यःने न्ह्याः वनेत इनाप यानाच्वंगु दु धासें वय्कलं गणेशमानया काय् धाइगु, पार्टीयात बांलाके माल धकाः कार्यकर्तां धायेगु यानाच्वंगु दु, थःत पदय् च्वनाः ध्यबा कमे यायेमाःगुु आवश्यकता मदु, अथे जूगुलिं थःत ग्वाहालि यायेत नं वय्कलं इनाप यानादिल ।
LEAVE YOUR COMMENTS