एमसिसि संशोधन जुइफइमखु- परराष्ट्रमन्त्री

येँ- नेपाःया न्हूम्ह परराष्ट्रमन्त्री डा. नारायण खड्कां एमसिसि संशोधन जुइफइमखु धयादीगु दु । संयुक्त राष्ट्र संघया ७६ क्वःगु महासभाय् ब्वति काःझाःम्ह मन्त्री खड्कां न्यूयोर्कय् गैरआवासीय् नेपालीतय् दथुइ जूगु छगू ज्याझ्वलय् न्ववानादिसें एमसिसि संशोधन यात धाःसा मेमेगु देशय् लागू जुइधुंकूगु एमसिसिइ प्रभावित जुइगुलिं नेपालं एमसिसि संशोधन यायेफइमखु धयादीगु खः ।

‘एमसिसिया अन्तर्राष्ट्रिय मापदण्ड दुगुलिं नेपालं संशोधन यात धाःसा थ्व लागू जुइधुंकूगु मेमेगु देय् नं प्रभावित जुइ, उकिं नेपालं जक संशोधन यायेत थाकुइ’ वय्कलं धयादीगु दु ।

थ्व झ्वलय् वय्कलं पुलांम्ह प्रधानमन्त्री ओलीं थः सरकारय् दुबलय् आःया प्रधानमन्त्री व कांग्रेस सभापति शेरबहादुर देउवायात तःक्वः हे नापलानाः एमसिसि संशोधन मयासे हे पास यायेमाः धकाः धयाच्वंगु खँ न्ह्यथँसें आः एमसिसि बारे जुयाच्वंगु म्वाःमदुगु प्रचार जुयाच्वंगु खँ नं धयादीगु दु । वय्कलं एमसिसि राष्ट्रिय सहमति यानाः पास यायेमाःगु खँ धयादीगु खः ।