उदाय् समाजया तःमुँज्या क्वचाल

येँ -उदाय् समाजया झिंगुक्वःगु दँमुँज्या व च्याक्वःगु तःमँुज्या वंगु शनिवाः कसाः ख्यः दल्लुइ तःजिक जुल ।उदाय् समाजया नायः डा. रुपज्योति कसाःनं त्वाःदेवाय् मत च्याकाः उलेज्या यानादीगु उगु ज्याझ्वलय् समाजया न्वकु डा. प्रेमरत्न स्थापितं लसकुस यानादीगु खः ।

दँमुँज्याय् मूछ्याञ्जे राजुकुमार कसाःनं वार्षिक प्रगति प्रतिवेदन, दांभरिं प्रविणरत्न तुलाधरं आर्थिक प्रतिवेदन न्ह्यब्वयादीगु खःसा तवः समाजया नायः तेजरत्न ताम्राकार, स्थापित खलःया नायः दिपकरत्न स्थापित, असं तुलाधर खलःया नायः ललितकाजी तुलाधर, शिलाकार खलःया नायः उत्तमराज शिलाकार, कसाः तःधं गुथिया नायः पूणवीरसिंह कसाः, श्री दिगु ख्यः गुथिया नायः रमेश तुलाधर, सिख्राकार समाजया नायः आयुरत्न सिख्राकार, बनिया खलःया नायः अमृतमानसिंह बनिया व उदाय् समाज मिसा पुचःया नायः कीर्ति तुलाधरपिंसं उदाय् सरोकारया पक्षयात कःघाना थःथःगु नुगः खँ तयादीगु खः ।

उगु ज्याझ्वलय् सुगतरत्न सिन्दुराकार व प्रेमहिरा तुलाधरं सम्पादन याःगु उदाय् समाः स्मारिकाया उलेज्या नायः डा. रुपज्योतिं यानादिलसा ज्याझ्वलय् उदाय् ज्याथजिथि, डाक्टर, इन्जिनियर व शैक्षिक ख्यलय् ताःलाःपिं मस्तय्त हना व छात्रवृति, अशक्तपिंत हःपाः हना–पौ लिसें थीथी व्यक्तित्वपिंत सिरपाः लःल्हायेगु ज्या जूगु खः ।

उगु हे ज्याझ्वलय् नेपालभाषा ख्यलय् उत्कृष्ट योगदान यानादीम्ह हितकर वीरसिंह कसाःयात नेपालभाषा साहित्य हना, बुद्ध धर्म सम्वन्धि उत्कृष्ट योगदान यानादीम्ह पञ्चवीरसिंह तुलाधर, लाभरत्न तुलाधरयात बुद्ध धर्म हना, नेपालभाषाय् उत्कृष्ट योगदान याःपिं केशरमान ताम्राकार व दीपकरत्न तुलाधरयात नेपालभाषा हनापाखें विभुषित याःगु खः।

ज्याझ्वः लिपा डा. रुपज्योति अध्यक्षताय् न्हूगु ज्यासना पुचः नीस्वंगु खः । ज्यासना पुचलय् खलःपुचःपाखें संस्थागत दुजःया रुपय् डा. ज्ञानेन्द्र रत्न तुलाधर, मय्जु सुमित्रा तुलाधर, विकास रत्न कसाः, रजनी ताम्राकार, डा. प्रेमरत्न स्थापित, प्रेमकाजी बनिया, ज्ञानराजा सिख्राकार, गौरी शोभा सिन्दुराकार, सुरेश शिलाकार, निलकमल सेलालिकपिं व स्वतन्त्रकथं दिव्यरत्न स्थपित, शोभालक्ष्मी तुलाधर, दिव्यलक्ष्मी कसाः अथे हे मिसा दुजःपिंपाखें उत्पला तुलाधर, भवानी तुलाधर, सविता स्थापित निर्विरोध निर्वाचित जुयादीगु खः ।

सम्बन्धित बुखँ

LEAVE YOUR COMMENTS