२७ न्हु लिपा पिहां वल सरकारया साझा कार्यक्रम, ओलीया भ्रष्टाचार छानबिन

येँ -शेर बहादुर देउवाया सरकारं पूर्व प्रधानमन्त्री केपी शर्मा ओलीया पालय् जूगु भ्रष्टा–चार सम्बन्धी काण्डया छानबिन याइगु जूगु दु । सरकारं म्हिगः जारी याःगु न्युनतम साझा कार्यक्रमय् थ्व खँ उल्लेख यानातःगु खः ।

केपी सरकारया पालय् नं दकलय् अप्वः चर्चाय् वःगु भ्रष्टाचार सम्बन्धी काण्डयात छानबिन यायेगु धकाः साझा कार्यक्रमय् न्ह्यथनातःगु दु ।

थुकी विशेष रुपं थगुने कोभिड–१९ ल्वय् पनेत माःगु स्वास्थ्य सामग्री झिके यायेत जूगु आर्थिक अनियमित ज्यायात कयाः छानबिन यायेगु खँ न्ह्यथनातःगु दु । उगु काण्डय् सरकारय् दुथ्याःपिं विशेष नेतातय् मनूत हे संलग्न जूगु खँ चर्चाय् वःगु खःसा उकियात कयाः व्यापक खँ पिहां वःसां नं तत्कालीन प्रम ओलीं छानबिन ज्या धाःसा मन्ह्याकूगु खः । आः वर्तमान सरकारं उकी छानबिन यानाः दोषीयात कारवाही यायेगु खँ धाःगु दु ।

सूत्रतय् अनुमान कथं अबलय् स्वास्थ्य सामग्री हयेगु ज्याय् वर्तमान स्वास्थ्य राज्यमन्त्री उमेश श्रेष्ठलिसे आवद्ध छुं पुचःत नं सक्रिय जूगु खःसां उमिसं उगु ज्या याये मखंगु खः । अय् जूगुलिं श्रेष्ठलिसे आवद्ध व्यापारिक पुचःयाके थ्व काण्डलिसे सम्बन्धित फुक्कं प्रमाण दुगु जुयाः सरकारं थुकिया बारे छानबिन न्ह्याकेगु खँ न्हयःने अनुमान सूत्रं याःगु दु ।
सरकारं थ्व मंकाः कार्यक्रम हयेगु धकाः छुं ई न्ह्यः हे तयारी याःगु खःसां थुकी सरकारय् आवद्ध थीथी पार्टीया छगू हे मत जुइ मखंगु कारणं यानाः सार्वजनिक याये मछिनाच्वंगु खः ।

थुकी विशेष यानाः कोभिड–१९ विरुद्धया खोप बीगु ज्यायात बः बिया तःगु दु । लिसें कोभिडया कारणं तःधंगु संकटय् लाःगु पर्यटन, सञ्चार, यातायात, पार्टी प्यालेस, सिनेमा लगायतया मनोरञ्जन ख्यःयात राहत जुइगु विशेष प्याकेज हयेगु खँ नं धया तःगु दु ।

अथे हे सरकार व माओवादी दथुइ जूगु शान्ति सम्झौताया पूवने मफया–च्वंगु गुलिखे ज्याखँत याकनं पूवंका छ्वयेगु खँ नं न्ह्यथनातःगु दु । नापं चर्चाय् वयाच्वं थें संविधान संशोधनया ज्या न्ह्याकेगु खँ नं धयातःगु दु ।

माधव नेपाल पुचः धाःसा मथ्यं
सरकारं थःपिनि साझा कार्यक्रम जारी यायेत ग्वसाः ग्वःगु ज्याझ्वलय् सरकारया छगू ‘घटक’ जुयाच्वंगु एमालेया माधव नेपाल पुचःया नेतात धाःसा उपस्थित मजुल । थ्व साझा कार्यक्रम जारी यायेगु ज्या प्रधानमन्त्री शेरबहादुर देउवा लिसें माओवादी अध्यक्ष पुष्पकमल दाहाल, जसपाया नेता उपेन्द्र यादव व डा.बाबुराम भट्टराई लिसें जनमोर्चाया नेता चित्रबहादुर केसीपिंसं यानादीगु खःसा थुकियात वाचन यायेगु ज्या धाःसा कार्यदलया संयोजक पूर्णबहादुर खड्कां यानादीगु खः । साझा कार्यक्रम जारी यायेगु ज्याय् एमालेया माधव नेपाल पुचःया वरिष्ठ नेतात उपस्थित जुयामदी । थौंकन्हय् एमाले दुने पार्टी एकताया लागिं कुतः न्ह्यानाच्वंगुलिं वय्कःपिं अन मझाःगु खँ धाःगु दु ।

सम्बन्धित बुखँ

LEAVE YOUR COMMENTS