
येँ – भारतं प्याज निर्यातय् प्रतिबन्ध तयेवं नेपाःया तरकारी बजारय् प्याजया भाः थहां वंगु दु । कालिमाटी तरकारी बजारय् म्हीग तक प्रतिकिलो ९० तकां मियाच्वंगु प्याज म्हिगः १२० तका थ्यंगु दु । खुद्रा धाःसा किलों १५० तका थ्यंगु दु । निन्हुया दुने मेगु तरकारीया भाः उलि थहां मवंसां नं प्याज धाःसा छक्वलं ३० तका थहां वंगु खः ।
भारतं आयात म्हो जुइवं प्याजया भाः थहां वंगु खँ व्यापारी उमेश शाहीं ‘नेपालभाषा टाइम्स’ यात कनादीगु दु । नेपालय् प्याज आपूर्ति भारतं जुयाच्वंगु खःसा आः भारतं आयात म्हो जूगुलिं भाः अझं थहां वनेफु । कालिमाटी तरकारी बजार विकास समितिया कथं न्हिं ८० टन प्याज भारतं आयात जुयाच्वंगु दुसा छुं भचा पाकिस्तानं नं वयाच्वंगु दु ।
थ्व स्वयां न्ह्यः नेपाःया व्यापारीतय्सं चिनियाँ प्याज आयात याःगु खःसां उकिया सवाः पाःगुलिं नेपालय् उलि चले मजूगु खँ धाःगु दु । तर बजारय् प्याजया अभाव जुइवं सवाः मदुगु जूसां चिनियाँ प्याज नं वये फइगु खँ व्यापारीतय्सं धाःगु दु । व्यापारीतय् कथं न्हापा गंगु लाभा नेपालय् अभाव जुइवं चीनं आयात जूगु खः ।
तर उगु इलय् नं उपभोक्तां चिनियाँ लाभा मसाः धकाः अस्वीकार याःगु खःसा आः वयाः उगु लाभां तकं नेपाःया बजाः कब्जा यायेत ताःलाःगु खँ नं व्यापारीतय्सं धाःगु दु । भारतं प्याज निर्यातय् प्रतिबन्ध तयेवं नेपाःया व्यापारीतय्सं चीनं प्याज आयात यायेगु प्रक्रिया नं न्ह्याकेधुंकूगु खँ सीदुगु दु ।
उकिया निंतिं नेपालय् फलफूल निर्यात यानाच्वंपिं चिनियाँ व्यापारीत सक्रिय जुइधुंकूगु दु ।चीनं नेपालय् स्याउ व जुनार निर्यात यानाच्वंगु दु । न्हापा भारतय् उत्पादन जुइगु काश्मिरी स्याउ नेपालय् खपत जुयाच्वंगु खःसा आः चिनियाँ स्याउं नेपाःया बजाः कब्जा यानाच्वंगु दु ।
LEAVE YOUR COMMENTS