च्यादँ न्ह्यवंनिसें दिनाच्वंगु नागेंचा प्याखं हानं न्ह्यात

येँ -चाबहिली वंगु छुं न्हि न्ह्यवंनिसें सनिलय् छपुचः ल्याय्तम्हत खिं, ताः व छुस्याः थानाः म्ये हालाच्वंगु न्यनेदुसा स्वम्ह–प्यम्ह मिजं मस्त ल्हाः व तुति संकाः वहे ताल नापं तुं प्याखं हुलाच्वंगु खनेदु । ‘थ्व नागेंचा प्याखंया प्रशिक्षण जुयाच्वंगु खः’ नागेंचा प्याखं संरक्षण समितिया नायः भाजु जलदराज वैद्यं कनादिल । “च्यादँ दत थ्व प्याखं दिनाच्वंगु, येँ महानगरपलिकाया मेयर भाजु विद्यासुन्दर शाक्यया ग्वाहालिं नागेंचा प्याखनं पुनर्जीवन काःगु खः।” वय्कलं तनादिल ।

प्याखं गुरु निरेश शाक्य व सचिन शाक्य प्याखं प्रशिक्षणय् व्यस्त खनेदु । रोनी शाक्य, शुभलब शाक्य, उमित लामा वैद्य व आयुष डंगोल प्याखं सयेकाच्वंपिं न्हूपिं मस्त जयाच्वन । “यँयाः पुन्हि कुन्हु जयवागेश्वरीया नासः चुकय् पशुपति अमालकोट कचहरीं नासः द्यःया तान्त्रिकविधिं पुजाआजा यानाः भाद्रया पारुंनिसें स्वन्हुयंक बहनी थ्व प्याखं चाबही व ग्वल लागाया दबू व चुकय् हुलेगु याइ ” प्याखं स्यनादीम्ह गुरु सचिन शाक्यं कनादिल । बैशाखय् न्ह्यायेमाःगु थुगु प्रशिक्षण कोरोनाया कारणं स्थगित जुयाः थुगुसी प्याखं पूवंक स्यने मखंगु खः ।

प्याखनय् मू प्याखंम्वः महाद्यः व पार्वती जूगुलिं थुगु प्याखंयात महाद्यः पार्वती वा शिव–पार्वती प्याखं नं धायेगु याः । खास यानाः न्हापांगु दिं जयवागेश्वरीया आचाजुं नासः चुकय् चिलाख च्याकाः नासः चुकं न्ह्याकाः पशुपति बासुकी पट्ट चुक, पशुपति प्रांगण, भुवनेश्वरी, जयवागेश्वरी व वैद्य चुकय् हुइकी । निन्हु कुन्हु पशुपतिया प्यम्ह मूभट्टया निवासया प्रांगण, राम मन्दिर, गोरखनाथ व गुह्येश्वरी हुलेगु याइ ।

स्वन्हुया न्हि चाबहीया चन्द्रविनायक गणेद्यः व चाबहीया हे दबुली हुलाः जयवागेश्वरीया नासः चुकय् क्वचायेकी । थुकी महाद्यःजुइम्हेसिनं ख्वाःपाः तइ धाःसा पार्वती जुइम्हेसित मिसाथें च्वंक समाः याकाः वस्त्र पुंकी ।

“प्याखनय् च्वः, जति व प्रताल यानाः स्वंगू ताल दु, थ्व तालय् म्ये हालेगु याइ । म्ये नापनापं नृत्य नाटक छपु नं दु”, खिं गुरु कृष्णकाजी शाक्यं धयादिल ।

म्हिगः जूगु थ्व प्याखंया प्रदर्शन स्वयेत येँ मनपाया मेयर विद्यासुन्दर शाक्य नं झाःगु खः । वय्कलं दांया अभावं प्याखं दिकेमाःगु अवस्था वयेमा धकाः थुकियात नं मनपां ग्वाहालि यानागु खँ कनादिल । मनपां थुगुसी थ्व प्याखं क्यनेगु लागिं ५ लाख तका ग्वाहालि याःगु खः ।

सम्बन्धित बुखँ

LEAVE YOUR COMMENTS