ने. सं. ११४४ कौलाथ्व दशमी - स्याक्वत्याक्व

प्रदेश नम्बर १ व २ या नां छु ?

येँ-संघीय गणतन्त्र नेपाः घोषणा लिपा प्रदेश सरकार गठन जूगु स्वदँ पूवनेधुंकाः नं प्रदेश नं. १ व २ या नां तयेगु ज्या धाःसा अझं अन्योल हे लानाच्वंगु दनि । प्रदेश १ य् प्रदेश सभा गठन जुइधुंकाः च्याक्वःगु अधिवेशन क्वचायेधुंकूगु दु, अथे खःसां थन आःतकं प्रदेशया नां छु तयेगु धयागु क्वःछी फयाच्वंगु मदुनि । प्रदेशया नां तयेगु निंतिं प्रदेश सभाया दुई तिहाइ बहुमतया सहमति माःगुलिं नं नां तयेत समस्या वयाच्वंगु खः ।

थुगु प्रदेशय् नं पहिचानया आधारय् नां तयेमाः धयागु खँ दु । पहिचानया आधारय् लिम्बुवान वा खम्बुवान नां तयेमाःगु स्थानीय आदिवासी जनजातितय् माग दु । तर जातीय पहिचानया आधारय् सहमति कायम यायेफुगु अवस्था मदुनिसा भूगोलया आधारय् सगरमाथा, मेची, कोशी आदि नां तयेगु सम्बन्धय् नं छुं कथंया सहमति जुइफुगु मदु ।

प्रदेश सरकारं वइगु असोज २२ गते निसें गुक्वःगु अधिवेशन सःतूगु दु । तर थ्व अधिवेशनं नं प्रदेशया नां धाःसा तये फइगु अवस्था मदु । एमाले नेता भीम आचार्यया नेतृत्वय् छुं न्हि न्ह्यः जक गठन याःगु प्रदेश सरकार नं आः अल्पमतय् लानाच्वंगु दु । एमाले कुचा जुयाः थनया झिम्ह सांसदत एकीकृत समाजवादीइ दुहां वंगुलिं सरकार अल्पमतय् लानाच्वंगु दु । न्हापा एमालेया हे शेरधन राईया सरकार दुबलय् दुई तिहाइ बहमत दुगु इलय् हे नां तयेत असफल जूगु अवस्थाय् आः अल्पमतया सरकारं नां तफइगु अवस्था मदु । उकिं वर्तमान सरकारं गुक्वःगु अधिवेशनय् नांया खँ न्ह्यःने तकं हइगु खने मदु ।

राईया सरकारं स्वक्वःगु अधिवेशनय् प्रदेश १ या राजधानी विराटनगर यायेगु व प्रदेशया नां तयेगु सम्बन्धी प्रस्ताव हःगु खःसां राजधानी जक कायम यायेत सफल जूगु खः । प्रदेशया नामय् सहमति जुइ मफयेवं आःतकं प्रदेशया नां छु तयेगु धयागु अन्योल हे जुयाच्वंगु खः ।