भिंद्यः गुथि १११ दँय्

येँ –  भिंद्यः गुथि कालिमातिया सछि व झिन्छदँ पलिस्था न्हि (१११ औं स्थापना दिवस) वंगु शनिवाः केन्द्रीय मानन्धर संधया उपसभापति भाजु बद्रिनारायण मानन्धरया मू पाहाँ सुइ छगू ज्याझ्वः यासें हन । भिंद्यः गुथिया कजि तिर्थमान मानन्धरया सभापतित्व जूगु ज्याझ्वलय् ७५ दँ पुले धुंकूपिं न्याम्ह गुथिया मू दुजः थकाली डबलमान मानन्धर, शंकर मानन्धर, हरिभक्त मानन्धर, बुद्धरत्न मानन्धर व बालकृष्ण मानन्धरपिंत हनेगु ज्या नं जूगु खः ।

अथेहे विषेश सम्मान कथं मदुम्ह राधाकृष्ण मानन्धरयात मरोनोपरान्त सम्मान नं याःगु खः । गुथिया मस्तय्गु प्रतिभा ब्वलंकेगु लागि नीस्वना तःगु धर्मकृष्ण–तेजलक्ष्मी मानन्धर प्रतिभा सिरपाः नं लःल्हाःगु खः । वंगु भिंद्यः गुथिया होली पुन्हि भ्वजय् प्याखं ल्हुया थःथःगु प्रतिभा न्ह्यब्वया न्हाप, लिउ व लियांलिउ लाःपिं मस्त पलिसा मानन्धर, प्रियोक्ती श्रेष्ठ व पल्पसा मानन्धरयात दसि पौ नापं नगद सिरपाः दाता धर्मकृष्ण मानन्धरं लः ल्हानादीगु खः ।

अथेहे एसइइ परिक्षाय् ताःलाःपिंत बियावयाच्वंगु रामप्रसाद–सानुमैयाँ मानन्धर लुमन्ति सिरपा सुमेश मानन्धरयात दाता जगदिश मानन्धरं दसिपौ नापं नगद सिरपा नं लःल्हानादीगु खः ।अथेहे के.मा. संघया ६६ औं पलिस्था दिवसया उपलक्ष्यय् जूगु थीथी कासाय् सिरपाः त्याकेत ताःलाःपिं भिंद्यः गुथिया जः दुजःपिं पलिसा मानन्धर, पल्पसा मानन्धर, बिन्दिया मानन्धर व बिशेष मानन्धरयात नं हनेगु ज्याः जुगु खः ।

गुथिया छ्याञ्जे प्रकाश बहादुर मानन्धरं लसकुस यानादीगु ज्याझ्वलय् मूपाहाँ बद्रिनरायण मानन्धरं सछि व झिंछदँ पुलांगु भिंद्यः गुथिं थःगु परम्परागत गुथि भ्वय् नापनापं थज्याःगु सामाजिक, सांस्कृतिक ज्याझ्वः लिपा लिपा अझ झःझः धायेक याना वनेफयेमा धकाः भिंतुना बियादिल । गुथिया लिउ कजि धर्मकृष्ण मानन्धरं सुभाय् देछायादीगु खः । ज्याझ्वःया निगूगु ब्वय् थीथी साँस्कृतिक ज्याझ्वः न्ह्यब्वयेगु ज्या नं जूगु खः ।

सम्बन्धित बुखँ

LEAVE YOUR COMMENTS