ने. सं. ११४४ कौलाथ्व पारू - नःलास्वनेगु

जोखिम दुसां धमाधम स्कुल चायेका हल

येँ- कोरोना महामारीया खतरा म्हो जुया वंगु भाःपिसें स्वनिगःया स्कुलत धमाधम चायेकेगु शुरु याना हःगु दु । थ्व झ्वलय् चीधंगु स्कुलत चायेकाहःसां अप्वः विद्यार्थी दुगु स्कुलत धाःसा मोहनि न्ह्यः मचायेकीगु खँ धाःगु दु ।

म्हिगः स्वास्थ्य तथा जनसंख्या मन्त्रालयय् सरोकारवालतय् सहलहया झ्वलय् कोरोना महामारीया जोखिम कायम हे दुगुलिं स्कुल चायेकेत हथाय् मचायेगु सहमति जूगु खः । निजी तथा आवासीय विद्यालय अर्गनाइजेशन प्याब्सनया सहअध्यक्ष डीके ढुंगानां विद्यार्थी संख्या अप्वः दुगु विद्यालय तत्काल मचायेकेगु सहमति जूगु खँ कनादीगु दु । तर म्हो विद्यार्थी दुगु स्कुल धाःसा च्वय्या तगिंया विद्यार्थीयात भौतिक उपस्थितिइ ब्वंकेगु व्यवस्था यायेफइगु खँ धाःगु दु ।

मन्त्रालयं म्हो विद्यार्थी दुगु विद्यालय नं स्वास्थ्य मापदण्ड नालाः चायेकेगु सहमति जूगु खँ धाःगु दु । स्वनिगः ‘रेड जोन’ दुने लाःसां नं फुक्कं थासय् बिस्कं अवस्था दुगुलिं विद्यार्थी म्हो दुगु विद्यालय् स्वास्थ्य मापदण्ड नालाः चायेकेगु व अप्वः विद्यार्थी दुगु स्कुल बुलुहुँ चायेकेगु सहमति जूगु खँ सीदुगु दु ।

सहलहया झ्वलय् स्वास्थ्य मन्त्रालयया अधिकारी, शिक्षा, विज्ञान तथा प्रविधि मन्त्रालयया सचिव, सीसीएमसीया अधिकारी व शिक्षा क्षेत्रलिसे सरोकार तइगु थीथी व्यक्तिपिंसं ब्वति काःगु खः ।
उकथं हे नेपाल अभिभावक संघया अध्यक्ष सुप्रभात भण्डारीं नं मोहनि न्ह्यः स्कुल मचायेकेगु भद्र सहमति जूगु खँ कनादीगु दु । वय्कःया कथं गुलिखे स्कुलया विद्यार्थी थःगु जिल्ला वनाच्वंगुलिं यानाः मोहनि लिपा जक स्कुल चायेकेत भद्र सहमति जूगु खः ।