लुम्बिनीया प्रदेश प्रमुख शेरचनपाखें ज्या शुरु

येँ – लुम्बिनी प्रदेशया प्रमुख पदय् नियुक्त जुयादीम्ह अमिक शेरचनं म्हिगः थःगु कार्यभार ग्रहण यानादिल । म्हिगः वय्कःयात प्रमुखया ज्याकुथी नेपाली सेनां सलामी अर्पण याःगु खः । शेरचन थ्व स्वयां न्ह्यः गण्डकी प्रदेशया प्रमुख खः । ओली सरकारं वय्कःयात माओवादी कोटां वःम्ह धासें पदमुक्त याना छ्वःगु खः ।

आः शेरबहादुर देउवाया सरकार वयेवं लुम्बिनी प्रदेशय् ओलीं नियुक्त यानातःम्ह प्रदेश प्रमुखयात चीकाः शेरचनयात नियुक्त याःगु खः । प्रदेश प्रमुख पदय् शेरचनाया नियुक्ति नापनापं आः लुम्बिनी प्रदेशया राजनीतिक समीकरण नं हिलीगु सम्भावना अप्वःगु दु ।

अनया मुख्यमन्त्री शंकर पोखरेल संसद दुने अल्पमतय् लायेधुंकूगु दु । आः न्हूम्ह प्रदेश प्रमुखं वय्कःया विरुद्ध वइगु छुं नं प्रस्तावयात तुरुन्त कार्यान्वयन यानाः पदमुक्त यायेफुगु खँ धाःगु दु ।