सरकारया हे कारणं महामारी न्यंगु द्वपं

येँ – नेपाली कांग्रेसं प्रधानमन्त्री केपी शर्मा ओलीयात झिंन्यागू बुँदाया ध्यानाकर्षण पौ लःल्हासें देशय् निगूगु चरणया महामारी वःगुया कारण सरकारया कमजोरी खः धकाः द्वपं बियादीगु दु ।

कांग्रेस सभापति शेरबहादुर देउवां बियादीगु उगु पती महामारीया खतरा अप्वया वनाच्वंगु इलय् नं सरकारं भीडभाड, तडकभडक व उलेज्या थेंज्याःगु ज्याझ्वःत याःगुलिं संक्रमण तीव्र रुपं न्यनावंगु खँ धयातःगु दु ।
पती कोरोना महामारीपाखें नागरिकया जीवन रक्षा यायेत स्वास्थ्य सामग्री, पीसीआर परीक्षण लगायत विशेष व्यवस्था यायेत नं सुझाव बियातःगु दु । नापं स्वंगूगु चरणया संक्रमणं नागरिकयात सुरक्षित यायेत खोपया सुनिश्चितता यायेत व उकिया निंतिं कुटनीतिक पहल यायेत नं सुझाव बियातःगु दु ।

उकथं हे पती न्हापांगु चरणया महामारीइ खने दुग्ु अनियमितता, भ्रष्टाचार बारे छानविन यायेमाःगु माग यासें कोभिड–१९ संकट व्यवस्थापन समिति (सीसीएमसी) या नेतृत्व क्षमतायात कयाः नं न्ह्यसः थनातःगु दु ।
थ्वहे झ्वलय् माओवादी केन्द्रं सीसीएमसी खारेज हे यायेमाःगु खँ धाःगु दु । म्हिगः छगू पत्रकार सम्मेलन यासें माओवादीं सीसीएमसी खारेज याये माःगु माग याःगु खः ।

सीसीएमसी छुं नं कथंया ज्या मयाःगु व अनियमितता व भ्रष्टाचार यायेगु ज्याय् केन्द्रित जूगु धासें उकियात खारेज यायेमाःगु खँ माओवादी केन्दं धाःगु दु । उकथं हे माओवादी केन्द्र सीसीएमसीया पलेसा सर्वदलीय संयन्त्र दयेकेमाःगु माग नं याइगु जूगु दु । उकथं हे माओवादी केन्द्रं आः पार्टीया पहलय् महामारी नियन्त्रणया निंतिं छगू कोष दयेकेगु, पार्टी पंक्तियात परिचालन यायेगु निर्णय नं याःगु दु ।