प्रदेश राजधानी येँनं पिने तयेमाः

प्रदेश राजधानी जूसा येँ अझ अस्तव्यस्त जुइगु दावी

येँ – प्रदेश नं ३ या मुख्यमन्त्री डोरमणि पौडेलं संघीय व्यवस्था व्यवस्थित यायेत प्रदेशया स्थायी राजधानी येँनं पिने हे तयेमाःगु खँ धयादीगु दु । येँदेय् केन्द्रीय राजधानी नं जूगुलिं प्रदेशया राजधानी नं थन जुइ मजिउगु बिचाः वय्कलं प्वंकादीगु खः । येँया न्हू बानेश्वरय् म्हिगः पत्रकारत नाप खँल्हाबल्हा यानादिसें मुख्यमन्त्री पौडेलं सिंहदरवारया किचलय् प्रदेशया राजधानी च्वने मजिउगु खँ धयादीगु खः ।

वय्कलं धयादी, ‘प्रदेशया राजधानी येँय् जुइ मजिउ । थ्व जिगु निर्णय खः । थ्व सिंहदरवारया किचः दुने च्वनाः प्रदेशया राजधानी च्वने फइ मखु ।’केन्द्रीय राजधानीयात गुकथं व्यवस्थित यायेगु व थनया जनतायात गुकथं डाइभर्ट यायेगु धइगु विषयय् नीदँ–नीन्यादँ न्ह्यवंनिसें सहलह याना जुयागु धासें तर आः हानं येँय् हे प्रदेशया नं राजधानी तयेगु खँ मिले मजूगु बिचाः नं वय्कलं प्वंकादिल ।

‘फुक्क मनूत येँय् वइगु जुयाः येँयात अस्तव्यस्त शहर मदयेकेगु खःसा दकलय् न्हापां राजधानीया पपुलेसन डाइभर्ट यायेमाः,’ मुख्यमन्त्री पौडेलं धयादिल, ‘थ्वहे वैज्ञानिक आधार खः । थ्वहे खँय् नीदँ–नीन्यादँ न्ह्यवंनिसें ज्या याना वया, आः हानं प्रदेशया राजधानीयात येँय् हयेगु धइगु पाय्छि जुइ मखु ।’

न्हापा हेटौंडा हे स्थायी राजधानी जुइमाः धयाच्वनादीम्ह पौडेलं आः हेटौंडा हे स्थायी राजधानी जुइमाः धइगु पक्षय् थः मदुगु खँ नं स्पष्ट यानादिल । वय्कलं राजधानी नुवाकोटय् यंकेत नं थः तयार दुगु खँ कनादिसें मेगु विकल्पया रुपय् रामेछापय् वनेत नं तयार जुइमाःगु जिकिर यानादिल ।

वय्कलं धयादिल, ‘राजधानी थज्याःगु थासय् यंकेमाः गन उगु क्षेत्रया नं विकास जुइफइ । थथे जुइफुसा येँय् यक्व मनू वइ मखु ।’ वय्कलं राजधानीया विषयय् थम्हं धायेगु स्वयां नं देय्या नेतृत्व याइपिं नेतातय्सं सहमति याःसा दीर्घकालीन प्रभाव व लिच्वः लाइगु बिचाः नं प्वंकादिल ।