रोहितयात प्रधानमन्त्रीया बधाई
येँ – अन्तर्राष्ट्रिय क्रिकेटय् विश्वकीर्तिमान तःम्ह रोहित पौडेलयात प्रधानमन्त्री केपी शर्मा ओलीं बधाइ बियादीगु दु । प्रधानमन्त्री ओलीं छगू ट्विट यासें अन्तर्राष्ट्रिय क्रिकेटय् अर्धसतक दयेकूम्ह दकलय् म्हो उमेरया कासामिया विश्व कीर्तिमान तयेत ताःलाःगुलिं बधाइ बियादीगु खः ।
ट्विटय् प्रधानमन्त्रीं अन्तर्राष्ट्रिय क्रिकेटय् नेपाली ल्याय्म्हं चूलाकूगु सफलतां राष्ट्रयात हर्षित याःगु खँ न्ह्यथनादीगु दु ।रोहितं शनिवाः युएइलिसे जूगु एकदिवसीय क्रिकेटय् ५५ बलय् ५८ रन दयेकूगु खः । थ्व अर्धसतक दयेकूगु इलय् रोहित १६ दँ १४६ न्हु जक दुगु खः ।
थ्वयां न्ह्यव थ्व कीर्तिमान भारतया महान क्रिकेटय् सचिन तेन्दुल्कर व पाकिस्तानी क्रिकेटर शहीद अफ्रिदीयाया नामय् दुगु खः । तेन्दुल्करं टेस्ट क्रिकेटय् १६ दँ २१३ न्हु दुबलय् अर्धसतक दयेकूगु खःसा अफ्रिदीं एकदिवसीय क्रिकेटय् १६ दँ २१७न्हु दुबलय् अर्धसतक दयेकूगु खः ।
LEAVE YOUR COMMENTS