भाषा आयोगया सिफारिसय् नेवाःतय् चिउताः

येँ -भाषा आयोगं नकतिनि सरकारयात लःल्हाःगु प्रतिवेदनयात कयाः नेवाःतय्सं चिउताः क्यना हःगु दु । उगु प्रतिवेदनय् बागमती प्रदेशया सरकारी छ्यलाबुलाया भाषा खस नेपाली बाहेक तामाङ व नेवाः भाय् नं जुइमाः धकाः सिफारिस यानातःगु दु ।

नेवाः राजनीतिक अभियानया शिक्षा कवःपाखें म्हिगः याःगु ज्याझ्वलय् नेवाः देय् दबूया नायः नरेश ताम्रकारं आः थ्व सिफारिसयात लागू यायेगु लागिं प्रदेश सरकारं ऐन दयेकेमाःगु जुइ, उकिया लागिं आः तामाङतलिसे जानाः पहल यायेगु खँ कनादिल ।

नेवाः राजनीतिक अभियानया नायः श्रीकृष्ण मानन्धरं थ्व ज्याया लागिं आः नेवाः खलः पुचःत छथासं च्वनाः मोर्चा दयेकाः न्ह्याः वनेगु खँ कनादिल । नेवाः शिक्षा अभियन्ता दिपक तुलाधरं आः नेवाः व जनजातित छथाय् च्वनाः सिफारिस कार्यान्वयनया लागिं सरकारयात दबाब बीमाः धयादिल ।

कवःया नायः बिष्णु चित्रकारया अध्यक्षताय् जूगु उगु भर्चुयल मुँज्याय् मदनसेन वज्राचार्य, देवदास मानन्धर, सुरेश किरण, रविन्द्र वज्राचार्यपिंसं नं बिचाः तयादीगु खः । ज्याझ्वः न्ह्याकादीम्ह विद्या चित्रकारं आः थुकिया लागिं न्ह्याः वनेगु रोडम्याप तयार यानाः हानं मुँज्या च्वनेगु खँ कनादिल ।