वीपीया पार्टीइ हिन्दू राष्ट्रया लबिङ

येँ – नेपाली कांग्रेसया महासमिति बैठक जुयाच्वंगु ई । थ्व बैठकय् नेपाःयात हिन्दू राष्ट्र हे दयेकेमाः धकाः लबिङ यासें छगू पुचलं हस्ताक्षर संकलन यानाच्वंगु अवस्था । अले वहे इलय् पुलांम्ह प्रधानमन्त्री डा. तुलसी गिरी नं सीगु घटना । घटना अलग अलग खःसां थुमि दथुइ छगू ‘लिंक’ धाःसा दु ।

व छु धाःसां वि.सं. २०१९ सालय् तत्कालीन जुजु महेन्द्रं पञ्चायतया संविधान दयेकाच्वंगु इलय् उकी नेपाःयात हिन्दू राष्ट्र दयेकीगु धारा थपे यायेगु सुझाव बिउम्ह नेता तुलसी गिरी हे जुयाच्वन । नेपाः हिन्दू राष्ट्र जुल धाःसा भारत स्वयां फरक खने दइ व विश्वया फुक्कं हिन्दूत नेपालय् तीर्थ वइगु तर्क वय्कलं तयादीगु खः ।

तर जीवनया अन्तिम इलय् वयाः धाःसा डा. गिरी थः हे क्रिश्चियन जू वन । अथे खःसां थःगु मृत्यु लिपा धाःसा वय्कःया अन्तिम संस्कार हिन्दू परम्परा कथं हे जू वन । मेगु संयोग । अबले जुजु महेन्द्रं संविधानय् हिन्दू राष्ट्र तयेगु ज्या याःबलय् तत्कालीन कांग्रेसया सभापति वीपी कोइरालां उकियात घोर विरोध यानादीगु खः । वय्कलं जुजुया उगु पलाःयात प्रजातन्त्रप्रतिया षडयन्त्र खः धकाः विरोध यानादीगु खः ।

तर आः वयाः वहे वीपी कोइरालाया पार्टी नेपाली कांग्रेसं जुजु महेन्द्रं तःगु हिन्दू राष्ट्रया बुँदा हानं तये माली धकाः हस्ताक्षर संकलन यानाच्वंगु खनाः राजनीतिक ख्यः अजूचायाच्वंगु दु । महासमिति बैठकय् वःपिं ६०० म्ह प्रतिनिधितय्सं हिन्दू राष्ट्रया मागय् हस्ताक्षर यायेधुंकूगु खँ धाःगु दु । महासमिति बैठक न्ह्यानाच्वंगु थौं गुन्हु क्यन ।