दाजु व किजा हिरो, तता व केंहें हिरोइन्

बलिउडय् तःकेहेँ व दाजु किजा हिरो हिरोइन यक्व दु । तर इपिं मध्ये छम्ह हे जक हिट जू मेम्ह हिट मजू । दाजु किजाया सन्दर्भय् सनी देओल हिट स्टारया रुपय् न्ह्यःने लाःसा वया किजा बबी देओलं उगु दर्जा काये मफुत । खय्त ला बबी देओलया गुप्त, सोल्जर, हमराज थेंज्याःगु गुलिखे फिल्म हिट हे जूगु खः । तर स्टारया रुपय् वयागु आयु ताहाः जुइ मफुत । अले सनी देवल व बबी देवलं अपने, यमला पगला दिवाना थेंज्याःगु फिल्मय् नापं म्हितल । थ्व निगुलिं फिल्म हिट जुल तर यमला पगला दिवानाया सिक्वेल धाःसा हिट जुइमफुत । सलमान खान बलिउडया छम्ह नांजाम्ह स्टार खः । वया निम्ह किजापिं दु, अरबाज खान व सोहेल खान । इपिं निम्हेसिनं बलिउडया फिल्मय् हिरो जुयाः म्हितूगु दु । अरबाज खानया “दरार” व “मालामाल विक्ली” थेंज्याःगु गुलिखे फिल्म हिट जुलसा सोहेलया नं “मैने प्यार क्यूं किया” थेंज्याःगु छगू निगू फिल्म हिट जुल । तर स्टारया रुपय् इमिसं थाय् काये मफु । झन सोहेल खानं थः दाजु सलमान खान लिसे नापं म्हितूगु फिल्मत “ट्युबलाईट”, “वीर” व “मैं और मिसेज खन्ना” थेंज्याःगु फिल्मत बांमलाक फ्लप जुल ।स्वीदँ स्वीन्यादँ न्ह्यः बलिउडय् डेब्यु याःम्ह अनिल कपुर आः तक नं थ्वहे ख्यलय् दिपा मदयेक लोकंह्वाना च्वंगु दनिसा वया किजा संजय कपुर अनवं थनवं मदयेक तने धुंकल । बबी देओलया थें हे तुं संजय कपुरया नं छगू निगू फिल्म धाःसा हिट हे जूगु खः । बलिउडय् दाजु किजाया दसु आपालं दु ।

पुलांगु खँ ल्हायेगु खःसा उगु ईया तसकं नांजाःम्ह दिलिप कुमारया किजा नासिर खान नं छक्वः हिरो हे जुयाः फिल्मय् इन्ट्री याःगु खः । दाजु किजा निम्हं म्हितूगु “गंगा जमुना” हिट हे जुल तर नासिर खानया हिरो जुइगु यात्रा धाःसा अनं लिपा मन्ह्यात । देव आनन्द छम्ह नांजाःम्ह स्टार खःसा वया किजा विजय आनन्द हिरो जुल तर स्टार जुइमफुत । मनोज कुमारया किजा राजीव गोस्वामी, सुनिल दत्तया किजा सोम दत्त नं छगू निगू फिल्म म्हिताः तनावंपिं खःसा आमिर खानया किजा फैजल खान नं थः दाजुलिसे “मेला” म्हितल । फिल्म नं फ्लप जुल । फैजल खानया क्यारियर नं फ्लप हे जुल । तर कपुर खानदानया नामं नांजाःपिं राज कपुर, शम्मी कपुर व शशी कपुर स्वंम्ह हिट स्टारत खःसा राज कपुरया काय्पिं रणधीर कपुर, ऋषि कपुर व राजीव कपुरय् माहिलाम्ह ऋषि कपुर छम्ह हे जक लोकंह्वात ।
दाजु किजा व तःकेहेँया दसु ला मेमेगु नं दु । दाजु व केहेँया हिरो हिरोइन यात्राया दसु म्हो जक दु । अज्याःगु हे छगू दसु सैफ अलि खान व सोहा अलि खानया खः । थुपिं निम्ह मध्ये सैफ स्टारया रुपय् नांजाः तर सोहा अलि तना वन । खय्त ला रणवीर कपुर व करिना कपुर नं तता व किजा खः । तर इपिं निम्ह दाजु किजाया मस्त खः । अले निम्हं लोकंह्वाःपिं स्टारया रुपय् हे न्हाय् धस्वाकेत ताःलापिं स्टारत खः । अले हिरोइन जूपिं तःकेहँेपिं मध्ये नं करिश्मा कपुर व करिना कपुर हे जक अज्याःगु नां खः, गुपिं निम्हं स्टारया रुपय् न्हाये धस्वाकेत ताःलाःपिं खः । मखु धइगु खःसा हिरोइन तःकेहेँ मध्ये नं छम्ह हे जक स्टार जूगु खनेदु । पुलांगु जमानाया खँ ल्हायेगु खःसा नूतन व तनुजाया नां छक्वः लुमंके बहजू । इपिं निम्ह मध्ये नूतन उगु ईया नांजाम्ह स्टार खःसा तनूजां अज्याःगु दर्जा काये मखं । तनूजाया नं “हाथी मेरे साथी” “ज्वेल थीफ” थेंज्याःगु हिट फिल्म ला दु तर नूतनया थेंज्याःगु दर्जाय् थ्यनेमफु । तनूजाया नं निम्हं म्ह्याय् फिल्मय् वल । निम्ह मध्ये काजोलं बलिउडय् टप स्टारया दर्जा कालसा वया केहेँ तनिसा तना हे वन ।

शिल्पा शेट्टी व शमिता शेट्टी नांयापिं तःकेहेँपिं मध्ये शिल्पा छगू इलय् नांजाःम्ह स्टारया रुपय् न्ह्यःने वःम्ह हिरोइन खःसा वया केहेँ शमितां उगु थाय् काये मफुत । खय्तला शमिता नं छम्ह प्रतिभां जाःम्ह हिरोइनया रुपय् बय्बय् हे जूम्ह खः तर शिल्पा थें स्टार धाःसा जुइमफु । विशेष यानाः बलिउडय् दाजुम्ह व तताम्ह हे लोकंह्वाःगु खनेदु । तर फरहा व तब्बुया सवालय् अथे मजुल । तब्बुसिबें न्ह्यःने फिल्म लाइनय् वःम्ह फरहाया डेब्यु फिल्म “फासले” नं ताःलाये मफुसा वया लिपा म्हितूगु फिल्मं नं वयात उलि लबः बिइ मफुत बरु छम्ह बाल कलाकारया रुपय् देव आनन्दया “हम नौजवान” नांयागु फिल्मय् च्यालेन्जिंग रोल याना बलिउडय् दुहां वःम्ह तब्बुया हिरोइनया रुपय् डेब्यु फिल्म “प्रेम” धाःसा हिट मजू तर लिपा वना वयागु क्यारीयर जहाँ थिना वल । वैंश वने धुंकूसा तब्बु आः तक नं दिपा मदिक्क फिल्म म्हिताच्वंगु हे दनि ।

छगू संजोग हे धायेमालि कि थथे दाजुकिजा वा तता केहेँ मध्ये तःधिकम्हेसिया जक पलाः क्वातूगु दसु यक्वः दु । राजेश खन्ना व डिम्पलया निम्ह म्ह्याय्पिं ट्वींकल खन्ना व रिंकिं खन्ना मध्ये चिधिकःम्ह म्ह्याय्या छगू निगू हे जक फिल्म पिहां वःगु खनेदुसा तःधिकःम्ह ट्वींकलं आपालं फिल्म म्हितल । छगू निगू हिट नं जुल । खय्तला ट्वींकलं बलिउडय् पलाः क्वातूकेला मफुत तर अय्सां छम्ह स्टारया रुपय् रिंकिं सिबें यक्वः हे न्ह्यःने लाः । थुपिं निम्हेसिया मां डिम्पल कपाडियाया केहेँ सिम्पल कपाडिया नं हिरोइन जुयाः फिल्मय् खनेदयेकः वःम्ह खः । डिम्पल बलिउडया स्टार खःसा सिम्पल अथे जुइमफुत । ट्वींकल व रिंकी थें हे तुं मुनमुन सेनया निम्ह म्ह्याय् रिया सेन व राय्मा सेनं नं छुं तारीफ याये बहगु ज्या याये मफुपिं खः । अथेहे तुं मलाइका अरोरा व अमृता अरोरा नांया निम्ह तःकेहेँ मध्ये तताम्हेसिनं छम्ह आइटम गर्लया रुपय् जूसां थःगु न्हाय् धस्वाकेत ताःलाःगु दु । तर अमृताया क्यारीयर धाःसा ताःलायेमफुत । आः वयाः अनिल कपुरया म्ह्याय् सोनम कपुरया केहेँ रिया कपुर नं फिल्मय् वइगु खँ पिहां वयाच्वंगु दुसा केटरीना कैफया केहेँ इजाबेल नं हिरोइन जुया वइगु खँ दु । खय्त ला सोनम कपुरया पलाः हे उलि क्वातुइ फयाच्वंगु खनेमदुसा आः वया केहेँया पलाः गथे जुइगु खः धइगु थौंकन्हय् चिउताया विषय जुया वयाच्वंगु दु । वास्तवय् रिया छम्ह फेशन डिजायनरया रुपय् थःगु पलाः क्वातुकेगु मति तयाः च्वंम्ह खः तर आकाझाकां व नं हिरोइन जुइगु खँ पिहां वःगु खनाः अजूचाःपिं नं आपालं हे दुसा केटरीनाया केहेँ इजाबेलया फिल्म ला याकनं हे रिलिज जुइगु खँ दु ।

बलिउडय् दाजु केहेँ वा तता व किजा हिरो हिरोइन जूपिं मध्ये अमिषा पटेलया किजा अस्मित पटेल नं खः । “कहो न प्यार है” थेंज्याःगु सुपरडुपर हिट फिल्मं डेब्यु याःम्ह अमिषाया लिपा “हमराज” व “गदर ः एक प्रेम कथा” हिट जूसां छम्ह हिरोइनया रुपय् वयागु पलाः क्वातुइ मफतसा वया किजाया पलाः नं अथेहे फ्यासुया वन । अथेहे तुं रविना टण्डनया किजा राजीव टण्डन अले जया प्रदाया किजा राजा धाम्हेसिया पलाः नं फ्यासूगु हे साबित जूगु खनेदत । विनोद खन्नाया निम्ह काय् मध्ये अक्षय खन्नाया पलाः वया किजा राहुल खन्नाया पलाः सिबें भतिचा न्ह्यःने लाःगु खनेदु तर अक्षय खन्नां नं छम्ह स्टारया रुपय् थःत ताःतक म्वाकातये फूगु खनेमंत । छगू जमानाय् फिरोज खान व संजय खान नं दाजु किजा हिरो कथं न्हाय् धस्वाकूपिं खःसा अशोक कुमार, किशोर कुमार व अनुप कुमार स्वम्ह दाजु किजा नं हिरो जुयाः म्हितूपिं खः । महेश भट्टया म्ह्याय्पिं पुजा भट्ट व आलिया भट्ट नं तता केहेँ खः, इमि मां निम्ह अबु छम्ह हे खः । अथेहे तुं राज बब्बरया न्हापांम्ह तिरीमय्जु नादिरा जहिर बब्बरया काय् आर्य व लिपायाम्ह तिरीमय्जु स्मीता पाटिलया काय् प्रतीक नं फिल्म म्हितूपिं खः । बलिउडय् समीरा रेड्डी, मेघना रेड्डी व सुषमा रेड्डी नांयापिं स्वम्ह तःकेहेँ नं छगू इलय् खनेदयेकः वःपिं खः । अथेहेतुं सुलक्षणा पंडित व विजयता पंडित नांयापिं नं निम्ह तःकेहेँपिं छगू ईलय् बलिउडय् खनेदयेकः वःपिं हिरोइन्त खः ।