यँयाःया द्यःपिं पिने पुजा फः मवनीगु

येँ -थुगुसी यँयाः पर्व मदिकुसे न्यायेकेगु तयारी शुरु जूसां लाखे, पुलुकुसि व हल्चोक आकाश भैरव (सवःद्यः) पाखें न्हापा न्हापा थें फुुकथासय् चाःहिलाः पुजा फयेगु ज्या धाःसा मयाइगु खँ धाःगु दु । कोरोना महामारीया ग्याःचिकु अझं ल्यं दनिगु कारणं न्हापा न्हापा थें छेँय् छेँय् वनाः पुजा मफयेगु निर्णय सम्बन्धित गुथिपाखें याःगु खँ सीदुगु दु ।

म्हिगः लाखे गुथिपाखें छगू वक्तव्य पिकासें थुगुसी लाखेछेँ बाहेक मेथाय् वनाः पुजा फः मवनेगु जानकारी बिउगु खः । पुलुकिसि व सवःद्यः नं पुजा फयेत मवनीगु खँ धाःगु दु ।
थ्व द्यःपिं कुमारी सालीगु इलय् पिहां वयाः कुमारी सालीगु लागाय् चाःहिलेगु वा महिलेगु धइगु बारे धाःसा अझं त्याजिक क्वःमजिउनिगु खँ धाःगु दु । थुकिया बारे अझं सहलह जुयाच्वंगु खँ इन्द्रजात्रा

व्यवस्थापन समितिया नायः गौतमरत्न शाक्यं ‘नेपालभाषा टाइम्स’ यात कनादिल । थुगुसी श्री कुमारीया रथ सालेगु तयारी शुरु जुइधुंकूगु खँ नं वय्कलं कनादिल ।
थ्वहे झ्वलय् म्हीग एकादशि कुन्हु लाखेछेँय् लाखे आजुया ख्वाःपाः पिलां पिकयाः आसनय् बिज्याकेगु ज्या जूगु दु ।