थौं सायाः, कन्हय् मतयाः
येँ (नेपालभाषा टाइम्स)÷थौं सापारु कुन्हु देय्न्यंकं सायाः पिकायेगु ज्या जुयाच्वंगु दु । थ्वहे दँय् मदुपिं मनूतय् नामं वया छेँजःपिंसं सा वा साया वसः पुंकाः सायाः छ्वइगु खः । येँय् हनुमानध्वाखा लागायात केन्द्र दयेकाः सायाः पिकायेगु याइसा ख्वपय् ताहामचा पिकायेगु याइ । थुकिया नापं हे घिन्तांघिसि ट्वाक धकाः कथि ल्वाकाः प्याखं नं पिकायेगु याइ ।
यलय् धाःसा सायाः पिकायेगु चलन मदु । अन मदुपिं मनूतय् नामय् कन्हय् मतयाः पिकाइगु चलन दु । यलया हे बुंगय् धाःसा म्हिगः हे मतयाः पिकायेधुंकूगु दु । बुंगय् मतयाः चाःहिलेगु थःगु हे बिस्कं मार्ग दु ।
थ्वहे झ्वलय् येँय् नकली सायाः जुयाः दान बीगु ज्वलं लुटालुट याइपिंत नियन्त्रण यायेगु लागिं नेपाल प्रहरी, नगर प्रहरी व हनुमानध्वाखाया नेपाली सेनाया शार्दुलजंग गुल्मपाखें समेत विशेष पहल याइगु जूगु दु । वंगु छुं ई न्ह्यवंनिसें नकली सायाः जुयाः दानया ज्वलं लुटे यानाः हैरान याइपिं अप्वयाच्वंगु खःसा उमित पनेगु लागिं स्थानीय जनतां समन्वनकारी भूमिका म्हिता वयाच्वंगु खः ।
LEAVE YOUR COMMENTS