सामाजिक सुरक्षा भत्ताय् राष्ट्रिय परिचयपत्र अनिवार्य याःगुया विरोध

येँ (नेपालभाषा टाइम्स)- सामाजिक सुरक्षा भत्ता कायेगु निंतिं राष्ट्रिय परिचयपत्र अनिवार्य याःगु खँय् विरोध सुरु जूगु दु । राष्ट्रिय परिपत्र अनिवार्य याःगुलिं ज्याथाजिथिपिंसं सास्ती नयाच्वंगु धासें थुकिया विरोध सुरु जूगु खः । थ्व हे झ्वलय् सरकारया थ्व निर्णययात कयाः संसदय् नं विरोध जूगु दु ।

गृह मन्त्रालयं सामाजिक सुरक्षा भत्ता कायेगु निंतिं न्हूगु नां दर्ता यायेत व नवीकरण यायेत वइगु साउन महिना दुने राष्ट्रिय परिचयपत्र नम्बर काये हे माःकथं अनिवार्य याःगु खः ।

प्रतिनिधिसभाय् बिहिवाः जूगु बैठकय् सांसदतय्सं राष्ट्रिय परिचयपत्र कायेगु निंतिं देय्न्यंकंया ज्याथाजिथि, ल्वगि, अशक्तपिं जिल्ला प्रशासन कार्यालयय् ब्वाँय् जुइ मालाच्वंगु धासें थ्व ज्यां उमिसं तसकं कष्ट फयाच्वंगुलिं राष्ट्रिय परिचयपत्र अनिवार्य यायेगु ज्या दिकेत सः थ्वयेकूगु खः । बैठकय् न्ववासें सांसद ऋषिकेश पोखरेलं छुं हे तयारी मयासे वइगु आर्थिक दँ निंतिं सामाजिक सुरक्षा भत्ता काइपिंसं राष्ट्रिय परिचयपत्र कायेमाः धकाः याःगु निर्णयं ज्येष्ठ नागरिक, अशक्ति व विरामीतय्सं तसकं सास्ती नयेमालाच्वंगु खँ धाःगु खः ।

सांसद पोखरेलं थ्व निर्णयं समाजय् आतंक थें न्यनाच्वंगु धासें न्ह्यः हे तयारी यानाः थ्व दछिया दुने छेँछेँय् हे वनाः बायोमेट्रिक यायेगु ज्या पूवंकाः आकिवं जक अनिवार्य यायेगु निर्णय लागू यायेमाःगु खँ धाःगु खः ।

अथेहे मेम्ह सांसद विद्या भट्टराईनं नं राष्ट्रिय परिचयपत्र बीगु निंतिं घुम्ती शिविर संचालन यायेधुंकाः जक थ्व व्यवस्था लागू यायेमाः धाःगु दु ।