फुक्क फोहोर वायेत छवाः माली

येँ – येँय् वंगु झिंच्यान्हु न्ह्यवंनिसें द्वँचिनाच्वंगु फाहोर म्हिगः मुना यंकेगु शुरु याःसां थ्व फुक्क फोहोर मुनेत छवाः मालीगु खँ धाःगु दु । वंगु झिंच्यान्हु न्ह्यवंनिसें येँ मनपा लगायत स्वनिगःया झिंच्यागुलिं स्थानीय तहया फोहोर थःथःगु नगरय् हे मुनाच्वंगु खः । सिसडोलया स्थानीय जनतां फोहोर वाके मबिउगु लिसें अन फोहोर वायेगु थासय् तक वनेगु लँ स्यनाच्वंगु कारणं फोहोर मुने मफुगु खः ।

येँ महानगरपालिकाया पहलय् म्हिगःनिसें सिसडोलय् फोहोर वायेगु ल्याखं ज्या न्ह्याकूगु खः । तर थुलिया दुने येँया सतकय् थुलि फोहोर द्वँचिने धुंकल कि व फुक्क मुना जक यंकेत हे छवाः काइगु खँ धाःगु दु । व नं वा वयाः मौसम खराब मजूसा जक छवाःया दुने मुने फइगु खँ धाःगु दु ।

ताः ई तक फोहोर मुना मयंकूगु कारणं येँय् जक करिब १५ हजार मेट्रिक टन फोहर द्वँचिनाच्वंगु खँ मनपाया वातावरण विभागं धाःगु दु । येँ मनपां वंगु साउन ३२ गतेनिसें हे सार्वजनिक सुचं पिथँसें नगरवासीयात छेँया पिने फोहोर वांमछ्वयेत इनाप याःगु खः । थ्व सुचं पिहां वःगुयां निवाः लिपा तिनि फोहोर व्यवस्थापन याये फुगु खः ।

मङ्गलवाः कामपा प्रमुख विद्यासुन्दर शाक्यया संयोजकत्वय् येँया प्रमुख जिल्ला अधिकारी कालीप्रसाद रिजाल, सडक विभागया महानिर्देशक, वरिष्ठ प्रहरी उपरीक्षकलगायतया बैठकं फोहोर मुना यंकेगु निर्णय याःगु खः । येँय् म्हिगःनिसें फोहोर मुना यंकेगु ज्या शुरु जूसां थाय्थासय् अझ नं फोहोरया द्वँ खनेदनि । अथे खःसां थ्व फोहोर आः छसिकथं म्हो जुया वनीगु खँ महानगरपालिकां धाःगु दु ।

वंगु झिंच्यान्हु न्ह्यवंनिसें सिसडोलया स्थानीयवासीं अवरोध याःगु लिसें मदिक्क वा वयाः अन वनेगु लँ समेत स्यनाच्वंगु कारणं फोहोर मुने मफयाच्वंगु खः । मंगलवाः च्वंगु मुँज्यां सिसडोलवासीया समस्या समाधान यायेगु लिसें लँ दयेकेगु ज्या नं न्ह्याकेगु निर्णय जूगुलिं म्हिगःनिसें फोहोर मुना यंकेगु ज्या जूगु खः ।

सिसडोलय् विसं २०६२ स निदँया लागिं जक धकाः फोहोर व्यवस्थापन याये फइगु क्षमताया ल्याण्डफिल साइट दयेकूगु खः । तर उकिया विकल्पय् तयार यानातःगु अनं २ किलोमिटर च्वय् च्वंगु बञ्चरेडाँडाय् सरकारं इलय् ज्या सिधयेका मबिउगु कारणं सिसडोलय् हे चां ल्हाकुल्हाकुं आः तक नं फोहोर व्यवस्थापनया ज्या याना वयाच्वंगु दु ।

स्वनिगलं न्हिं १२०० मेट्रिक टन फोहोर सिसडोलय् वायेगु यानाच्वंगु दु । उकी मध्ये येँ मनपाया जक ५०० मेट्रिक टन फोहोर अन वायेगु याइ । निजी व कामपा यानाः न्हिं म्होतिं नं २०० गः गाडीं अन फोहोर वायेगु यानाच्वंगु दु ।