येँ मनपां च्याद्वःप्वाः सतक मत तइगु

येँ – येँ महानगरपालिकां येँया थीथी थासय् च्याद्वःगः मत जडान दु । बहनिया इलय् जुइगु सतक दुर्घटना व अपराधिक क्रियाकलपा म्हो यायेगु आज्जु कथं सतक मत जडान यायेत्यंगु खः । वइगु वैशाख १ गतेनिसें कलंकी–एयरपोर्ट, त्रिपुरेश्वर–चक्रपथ व थापाथली–कमलपोखरी जुयाः पुतली सतक खण्डय् उगु मत तयेगु खँ येँ मनपां धाःगु दु ।

मत तयेगु निंतिं येँ मनपां चालु आर्थिक दँय् ५ करोड तका बजेट विनियोजन यायेधुंकूगु खँ प्रवक्ता ईश्वरमान डंगोलं कनादीगु दु । प्रवक्ता डंगोलया कथं फुक्कं वडाय् झिंखुद्वः मत जडान यायेमाःगु माग वयाच्वंगु खँ कनादिसें माग कथं मत तयेगु खःसा १० निसें १५ करोड तका खर्च जुइगु अनुमान नं यानादीगु दु । वइगु वैशाख महिनां ज्या न्ह्याकाः दछिया दुने क्वचायेकेगु आज्जु तयातःगु जानकारी नं वय्कलं बियादिल ।

अथेहे येँ मनपाया ग्वाहालिं महानगरीय प्रहरी परिसरं सिसी क्यामेरा तयेगु तयारी याःगु दु । उकिया निंतिं येँ मनपां प्रहरी परिसरयात स्वंगू करोड तका दां बीधुंकूगु दु । मनपां येँय् शान्ति सुरक्षा, अपराध नियन्त्रण, दुर्घटना न्यूनिकरण,फोहोर व्यवस्थापन, फुटपाथ नियन्त्रण व प्रदुषण न्यूनिकरणय् ग्वाहालि जुइ कथं उगु दां ग्वाहालि याःगु खः ।