यल लाय् कुलिइ पर्यटक अप्वल

यल (नेपालभाषा टाइम्स) – लिपांगु इलय् यलया लाय्कुलिइ च्वंगु संग्रहालय अवलोकन यायेत वइपिं पर्यटकया ल्याः अप्वःगु दु । यल संग्रहालयया कथं चालु आर्थिक दँया वंगु न्यालाया अवधि दुने संग्रहालय अवलोकन यायेत वइपिं पर्यटकया ल्याः अप्वःगु दु ।

संग्रहालयं बिउगु जानकारी कथं थगुने चालु आर्थिक दँया न्यालाया अवधिइ स्वयां चालु आर्थिक दँय् व हे अवधि दुने संग्रहालय अवलोकन यायेत वइपिं पर्यटकया ल्याः १ दशमलव ५ प्रतिशतं अप्वःगु दु । संग्रहालयया प्रमुख सुरेशमान लाखेया कथं संग्रहालय व नगरपालिकाया दथुइ समन्वय यानाः एकद्वार प्रणाली लागू यायेवं स्मारक क्षेत्र व संग्रहालय यानाः निखें वइपिं पर्यटकया ल्याः अप्वया वनाच्वंगु दु ।
वय्कलं धयादीगु दु, ‘संग्रहालय अवलोकन यायेत वइपिं स्वदेशी व विदेशी पर्यटकया ल्याः अप्वया वनाच्वंगु दु । संग्रहालयया कथं चालु आर्थिक दँया वंगु साउननिसें मंसिरतकया दुने छगू लाख न्हय्सः व न्हय्गुम्ह संग्रहालय अवलोकनया निंतिं वःगु दु । वंगु आर्थिक दँय् मुक्कं छगू लाख न्हय्खुद्वः गुसः व खुम्ह पर्यतकं संग्रहालय अवलोकन याःगु सीदुगु दु ।

थनिं स्वदँ न्ह्यःया तःभुखाचं क्षति जूगु संग्रहालय व उकिया जःखः थीथी थासय् मर्मत सम्भार नापं जीर्णोद्वार यायेगु ज्या न्ह्यानाच्वंगु दु । मर्मत व जीर्णोद्वारया इलय् नं पर्यटकतय्सं सामग्री अवलोकन याये खनेमा धइगु ल्याखं थौंकन्हय् अस्थायी प्रदर्शन कक्ष हे तयाः अवलोकन याये फइगु व्यवस्था यानाःगु दु ।

यलया लाय्कू लागा दुनेया संग्रहालय अवलोकनपाखें चालु आर्थिक दँया थ्व अवधि दुने न्यागू करोड चय्निगूलाख ख्वीन्याद्वः न्हय्सः व न्यय्तका दां संकलन याये धुंकूगु दु ।