अधिकांश सांसदपाखें ‘बागमति प्रदेश’ नां अस्वीकार

नेकपा संसदीय दलय् वहस शुरु

येँ – प्रदेशया राजधानी व नामाकरणयात कयाः शुक्रवाः व शनिवाः च्वंगु प्रदेश नेकपाया प्रदेश संसदीय बैठकय् आपालं सांसदतय्सं बागमति प्रदेश व हेटौंडायात राजधानी दयेकेगु खँय् विरोधय् याःगु दु ।

शुक्रवाः न्ववाःपिं झिंच्याम्ह सभासदपिं मध्ये झिंन्याम्हेस्यां प्रदेश व राजधानीया विरोधय् बिचाः तःगु खः । स्वम्हेस्यां पार्टीया निर्णययात समर्थन यायेमाःगु सुझाव बिउगु खः । अथे हे शनिवाः च्वंगु दलया बैठकय् नीम्ह सांसदं न्वंवाःगु खःसा उकी मध्ये गुम्हेस्यां पार्टीया निर्देशनयात माने यायेमजिउ धाःगु खःसा मेपिं गुम्हेस्यां पार्टीया निर्णय माने यायेमाःगु सुझाव बिउगु खः ।

थ्वहे झ्वलय् नां कने मयःम्ह छम्ह प्रदेश सांसदं राजधानी तोके यायेगु निंतिं जुइगु कार्यविधिइ सहमति जुइधुंकूगु दुसा आः प्रदेशया नामांकरणयात निंतिं कार्यविधि दयेकेगु तयारी जुयाच्वंगु दु । वय्कःया कथं संविधानया धारा २८८ कथं प्रदेशया नां व राजधानीयात कयाः निर्वाचन यायेमाःगुलिं कन्हय् कार्य व्यवस्था समितिया बैठक च्वनाः कार्यविधि दयेकीगु सम्भावना दु ।

कार्यविधि कथं २१ गतेया बैठकं कार्यविधि अनुमोदन यानाः २२ गते प्रदेश व राजधानीया निंतिं मतदान जुइमाःगु खः तर प्रदेश व राजधानी बारे पार्टीया निर्देशन वःगुलिं २२ गते निर्वाचन जुइगु सम्भावना मदयावनाच्वंगु दु। सूत्रया कथं दलया बैठक लिपा हे सचिवालय बैठक च्वनीगु जूगुलिं २२ गते राजधानी व नांया बारे मतदान मजुइफु। शनिवाःया बैठकय् पार्टीया निर्णय पाय्छि मजू धासें सांसदपिं पशुपति चौलागाईं, विशाल खड्का, कुसुम थापा, प्रकाश श्रेष्ठ, विजय सुवेदी, हिमाली गोले लगायतं विरोध प्वंकूगु खः ।

थ्वहे झ्वलय् पार्टी सचिवालयया निर्णय धुंकाः ३ नम्बर प्रदेशया सांसदपिंत पार्टीं याःगु निर्णय लागू यायेमाः धकाः थुइकेगु निंतिं नेकपाया अध्यक्ष पुष्पकमल दाहाल व महासचिव बिष्णु पौडेल हेटौंडा वनेगु तयारी जुयाच्वंगु खँ धाःगु दु। तर वय्कःपिंत सांसदतय्सं प्रतिवाद याये फुगु खँ धाःगु दु ।

थ्वहे झ्वलय् पार्टीया निर्णययात प्रदेश ३ या इन्चार्ज अष्टलक्ष्मी शाक्यं नं असहमति प्वंकादीगु दु। वय्कलं पार्टीया सचिवालयया बैठकं प्रदेश कमिटीयाके तकं मन्यँसे थ्व निर्णय याःगु धासें उकियात गुगुं नं हालतय् थम्हं स्वीकार याये मफइगु खँ धयादीगु दु। वय्कलं धयादी, ‘पार्टी सचिवालयया बैठकं छुं आधारय् निर्णययात, नत थःके न्यंगु दु, नत सहलह हे याःगु दु, पार्टीं निर्णय लादे यायेगु धइगु संविधानया मर्म अःखः खः, उकिं जिमिसं पार्टीया निर्णय पालना याये फइ मखु।’