न्हय्गां जात्रा अस्तित्वय् दया च्वंतले किपू नं ल्यनाच्वनी
किपू – जनकवि दुर्गालाल श्रेष्ठं गबलय् तक किपुलिइ न्हय्गां जात्रा अस्तित्वय् दयाच्वनी, अबलय् तक किपू नं ल्यना च्वनी धयादीगु दु । जनकवि श्रेष्ठं उगु खँ लोककवि राजभाई जकःमिया च्वसाय् व म्येँ हालामि रिता महर्जनया लसय् पिदंगु ‘न्हय्गां जात्रा’ म्येँचाः पितब्वज्याया झ्वलय् धयादीगु खः ।
वय्कलं नेवाःत तरवारं जक बूगु खः, विचारं बूगु मदुनि धासें नेवाःत न्ह्याबलें ल्यनाच्वनीगु धयादिल । मन्दः फल्चा अमल्सि खलःया ग्वसालय् थनया नगरमण्डप श्रीकीर्ति विहारय् जूगु उगु ज्याझ्वः त्वाःदेवाय् मत च्याकाः उलेज्या यानादिसें जनकवि श्रेष्ठं व विशेष पाहांपिंसं म्येँचाःया पितब्वज्या नं यानादीगु खः ।
खलःया नायः शोभा महर्जनया सभापतित्वय् न्ह्याःगु ज्याझ्वलय् विशेष पाहांकथं झायादीपिं प्रदेश सांसद पुकार महर्जन, किपू नगरपालिकाया प्रमुख रमेश महर्जन, पुलांम्ह पर्यटन राज्यमन्त्री दिलीप महर्जन, नांजाःम्ह म्येँ हालामि पवित्र कसाःनं नुगःखँ प्वंकादीगु खःसा म्येँ च्वमि जकःमिं चिनाखँ न्यंकादीगु खः ।
ज्याझ्वलय् म्येँचालय् लय् चिनादीम्ह महर्जनलिसें संगीता शाक्य, रत्नशोभा महर्जन, रानीशोभा महर्जन, स्वस्ति महर्जन, सतिश महर्जन, कृष्णमान डंगोलं म्येँचालय् दुथ्याःगु म्येँ न्यंकादीगु खः ।
उगु म्येँचालय् म्येँ हालादीपिं ईश्वर अमात्य, सानुबाबु महर्जन, पवित्र कसाः, श्रृजना श्रेष्ठ, सरिता शाही, मथुरा महर्जनलिसें संगीत संयोजन यानादीपिं हरिशरण साय्मि, जीवित जल्मि, सन्तोष महर्जनलिसें ग्वाहालि यानादीपिंत मतिनाया चिं नं लःल्हाःगु खः । खलःया दुजः दानबहादुर महर्जनं लसकुस यानादीगु ज्याझ्वलय् रिता महर्जनं सुभाय् देछानादीगु खः ।
LEAVE YOUR COMMENTS