स्वन्तिया झ्वलय् स्कुल–स्कुलय् म्हपुजा

येँ – थनिंनिसें स्वन्ति नखः शुरु जुल । स्वन्तियात मोहनि धुंकाःया तःधंगु नखः धाइ । स्वन्ति नखःया न्हापांगु न्हि कथं थौं क्वःपुजा खः । थुगुसी तिथिया गडबडीं यानाः खिचापुजा नं थौं हे माने याइपिं दु ।
स्वन्ति नखःया स्वन्हु मू पर्व मध्ये कन्हय् लक्ष्मीपुजा न्यायेकी । लक्ष्मीपुजा कुन्हु सा पुजा याइगु चलन दु । अथे हे कंस शुक्रवाः कुन्हु म्हपुजा माने याइसा शनिवाः किजापुजा याइ । थुगुसी किजा–पुजाया कन्हय् कुन्हु नं सार्वजनिक बिदा बियातःगु दु । नेवाःतय् किजापुजाया कन्हय् कुन्हु स्वां क्वकयाः म्ह्याय्मस्तय्त सःतेगु चलन दु ।

थ्वहे झ्वलय् येँ देय्या थीथी स्कुलय् म्हिगः मंकाः कथं म्हपुजा न्यायेकेगु ज्या जुल । विद्यार्थी मस्तय्त म्हपुजा बारे जानकारी बीगु ल्याखं थीथी स्कुलय् म्हपुजा न्यायेकूगु खः । न्हापा निजी स्कुलय् जक थथे म्हपुजा याइगु खःसा थुगुसी थीथी सामुदायिक स्कुलय् नं म्हपुजा याःगु खः । थुगुुसीनिसें येँ महा–नगरपालिकापाखें नेपालभाषाया माध्यमं स्थानीय विषय ब्वंकेगु शुरु याःगुलिं उगु विषय ब्वनीपिं विद्यार्थी मस्तय्त येँ देय्या नखःचखः बारे जानकारी बीगु ल्याखं नं म्हपुजा न्यायेकेगु ज्या जूगु खः ।

म्हिगः येँया प्रभात मावि, हिमालय मावि आदि लगायत थीथी स्कुलय् शिक्षक शिक्षिकापिं जानाः मस्तय्त म्हपुजा याःगु खः । म्हपुजा ज्याझ्वलय् विद्यार्थी मस्तय्सं अतिकं न्ह्यइपुक ब्वति
काःगु खः ।