मपपाखें कर्मचारी दरबन्दी प्रस्ताव पारित

येँ – सरकारं कर्मचारी दरबन्दीयात स्वीकृत याःगु दु । स्थानीय तहया अन्तरिम संगठन संरचना व कर्मचारी दरबन्दीयात स्वीकृत याःगु खः । मन्त्रिपरिषद् बैठकं महानगरपालिका, उपमहानगरपालिका, नगरपालिका नापं जिल्ला समन्वय समितिइ खटे जुइपिं प्राविधिक व प्रशासनिकया निंतिं कर्मचारी दरबन्दी स्वीकृत याःगु खः । स्वीकृत दरबन्दीकथं निगुलिं समूहय् यानाः ५७,३५४ दरबन्दी स्वीकृत याःगु सूचना व संचार प्रविधि राज्यमन्त्री गोकुल बांस्कोटां कनादीगु दु । अथे हे मन्त्रिपरिषद्या उगु बैठकं संघय् २१ गू मन्त्रालयया नं सांगठनिक संरचना व दरबन्दी सम्बन्धी प्रस्ताव पारित याःगु दु । पारित प्रस्तावकथं केन्द्रय् आः कायम जुयाच्वंगु ३,२६० कर्मचारीयात नं क्वपालाः २,६५४ कायम याःगु दु । उकथं हे सरकारं स्थानीय तह सेवा प्रवाह सम्बन्धी व्यवस्था २०७४ यात नं पारित याःगु दुसा स्थानीय तह व प्रदेशया दथुइ सहजीकरणया निंतिं न्हूगु कानूनं नं दयेकीगु जूगु दु ।