नेपाः पार्टीया स्थापना दिवस

येँ – नेपाः राष्ट्रिय पार्टीया पार्टी स्थापना दिवस थ्वहे वइगु माघ ३० गते न्यायेकीगु जूगु दु । उकिया लागिं पार्टी अध्यक्ष डा. विजय सैंजुया अध्यक्षताय् १९ म्ह दुजः दुगु छगू ग्वसाः खलः नीस्वंगु दु । येँय् हे छगू ज्याझ्वः यासें दिवस हनीगु ग्वसाः दु । उगु हे ज्याझ्वलय् पार्टीया मदुम्ह सांसद लिसें नांजाःम्ह कवि बुद्ध साय्मिया लुमंति पौ नं पिथनेगु ग्वसाः जूगु दु । लुमंति पौ प्रकाशनया लागिं केन्द्रीय दुजः मंगलकृष्ण मानन्धरया संयोजकत्वय् छगू पुचः गठन याःगु दु ।

लुमंति पती प्रकाशनया लागिं बुद्ध साय्मिलिसे स्वापू दुगु च्वसुत छ्वया हयेत नं पुचलं सकसितं इनाप याःगु दु । पार्टीइ न्हय्म्ह न्हूपिं केन्द्रीय दुजः थपे याःगु दुसा स्वम्ह केन्द्रीय दुजःयात सेक्रेटारियटय् थपे याःगु दु । केन्द्रीय दुजः बिष्णुप्रसाद गोपालीयात सहसचिव व अनिल सुवालयात प्रवक्ता मनोनित याःगु दु । अथे हे संविधान कथं देय्या थीथी प्रदेशया लागिं संयोजक ल्ययेगु ज्या नं जूगु दु । प्रदेश नम्बर १ य् लक्ष्मी प्रकाश सैंजु, २ लय् मंगलकृष्ण मानन्धर, ३ य् अनिल सुवाल, ४ य् पञ्चकुमारी मानन्धर, ५ य् गौरी श्रेष्ठ व ६ लय् बिष्णुप्रसाद गोपालीयात संयोजक नं नियुक्त याःगु दु ।