प्रहरी दमनया विरोध
येँ – सडक विस्तार लगायत विकासया नामय् स्वनिगःया स्थानीय नेवाःतय्त विस्थापित याये कथं राज्यं हयाच्वंगु थीथी योजनाया विरोधय् म्हीग येँय् जूगु प्रदर्शनय् ज्वंपिं १३ म्हं प्रदर्शनकारीतय्त म्हिगः त्वःता हल । वय्कःपिंत म्हीग बहनी हे बानेश्वरया प्रहरी चौकीं टेकुया प्रहरी परिसरय् कुने हःगु खः ।
म्हीग वय्कःपिंत प्रदर्शनय् ब्वति कयागु मखु धकाः भ्वं याकाः त्वःतेगु खँ जूगु खःसां अज्याःगु भ्वँतय् सही यायेत सुं नं तयार मजुइवं चछि कुना बिउगु खः । अथे हे निम्ह प्रदर्शनकारीतय्त मुद्दा तयेगु धकाः प्रहरीं अडान काःगु खःसां म्हिगः धाःसा व खँयात नं त्वःताः छुं हे भ्वं मयाकुसे ससम्मान त्वःतूगु खः । म्हीग बहनी प्रहरीं ७० दँ पुलेधुंकूपिं निम्ह प्रदर्शनकारीतय्त त्वःतेगु जुइ धाःगु खःसां ७० दँ पुलेधुंकूपिं स्वयम्भूलाल मानन्धर (जुजुभाई) व गौतम मानन्धर निम्हेस्यां नं मेपिंत मत्वःतेगु खःसा थःपिं नं पिहां वने मखु धकाः अडान कयाः दुने हे च्वनादीगु खः ।
त्वःतूपिं सकसितं म्हिगः संघर्ष समितिया दुजःपिंसं लसकुस याःगु खःसा थौं छगू ज्याझ्वःया दथुइ वय्कःत हनीगु नं ग्वसाः दु ।
थ्वहे झ्वलय् म्हीग जूगु शान्तिपूर्ण प्रदर्शनय् प्रहरीं याःगु दमनयात सकस्यां विरोध याःगु दु । आदिवासी जनजाति कानून व्यवसायीतय्गु संस्था लाहुर्निपया अध्यक्ष शंकर लिम्बुं छगू वक्तव्य पिकासें अन्तर्राष्ट्रिय कानून कथं थःगु वसोबासया अधिकार सुरक्षित जुइमाः धकाः अधिकार प्mवं वःपिंत दमन यायेगु राज्यया नीति गलत जूगु खँ धाःगु दु ।
उकथं हे नेवाः देय् दबूया नायः नरेश ताम्रकारं नं छगू वक्तव्य पित बिसें अधिकारया माग याःपिं निहत्था जनतायात प्रहरीपाखें याःगु बर्बर दमन निन्दनीय जू धकाः आलोचना याःगु दु । नेपाः राष्ट्रिय पार्टीपाखें अध्यक्ष डा. विजयप्रकाश सैंजुं नं छगू वक्तव्य पित बिसें जनतायात उठिबास यायेगु राज्य नीतिया विरुद्ध दना वःपिं जनतायात दमन यायेगु प्रहरी बर्बरया विरोध यानादीगु दु ।
संघीय समाजवादी फोरम येँ जिल्ला कमिटीपाखें नायः मनरत्न शाक्यं नं छगू वक्तव्य पित बिसें स्वनिगःया स्थानीय नेवाःतय्त याःगु प्रहरी दमनया कडा विरोध याःगु दु । लिसें नेवाः राष्ट्रिय मुक्ति मोर्चा, नेकपा माओवादी (केन्द्र) येँ १५ वडा कमिटीं नं अलग अलग वक्तव्य पिकासें प्रहरी दमनया विरोध याःगु दु ।
LEAVE YOUR COMMENTS