न्हूदँया ज्याझ्वः यथावत न्ह्याइगु

येँ (नेपालभाषा टाइम्स)÷नेपाल संवत् राष्ट्रिय न्हूदँ समारोह समिति ११४३ या नायः प्रा.डा. नरेशमान बज्राचार्यं थौं छगू विज्ञप्ति पित बिसें थुगुसीया न्हूदँ ११४३ तःजिक हनेत सकसितं इनाप यानादीगु दु ।

वय्कलं न्हूदँया ज्याझ्वः तयारीया नितिं समारोह समितिं थीथी ज्या न्ह्याका वयाच्वंगु जानकारी बिसें न्हूदँ राष्ट्रिय पर्व जक मजुसे नेपाःया संस्कृति जूगुलिं न्हूदँ व थ्वलिसे स्वाःगु स्वन्ति नखः स्वन्हुयंकं झ्वःलाक्क न्यायेकेत नं इनाप यानादीगु दु ।

लिसें प्रा.डा. बज्राचार्यं उगु विज्ञप्तिपाखें सकलसित मदुम्ह वाङ्मय शताब्दीपुरुष लिसें वरिष्ठ संस्कृतिविद् युगपुरुष सत्यमोहन जोशी मदुगु दुःखयात थ्व दँय् शक्ति कथं न्ह्यःने यंकाः न्हूदँ ज्याझ्वः न्हापालिपा सिबें जनचेतना थनेगु कथं व नेपाःया मौलिक राष्ट्रिय संवत् नेपाल संवत् हलिंन्यंकं च्वनाच्वंपिं नेपाःमिपिन्त भिंतुना बीगु कथं व नेपाल संवत् राष्ट्रिय संवत् धायेधुंकाः सरकारपाखें यायेमाःगु ज्या याकेगु निंतिं दबाब बीगु कथंया ज्याझ्वः यायेत नं इनाप यानादीगु दु ।

शताब्दी पुरुष सत्यमोहन जोशी मदुगुलिं थुगुसी न्हूदँया ज्याझ्वः जुइ मखु धकाः हुइनाभुइना जूगुलिं समारोह समितिं थ्व विज्ञप्ति पिकयाः स्पष्ट याःगु खः ।

सम्बन्धित बुखँ

LEAVE YOUR COMMENTS