लगमय् गुंला बाजं ब्वज्या
- नेपालभाषा टाइम्स
- किपा-सुगरत्न सिन्दुराकार
येँ(नेपालभाषा टाइम्स)/ येँ महानगरपालिका २१ वडाया ग्वसालय् लगं त्वालय् शाक्य वज्राचार्यतय् बहाः बहीया गुंला बाजं (धाःबाजंं)या ब्वज्या जुल । कीर्तिपूण्य महाविहार गुंला बाजं खलःया व्यवस्थापनय् जूगु ज्याझ्वलय् येँ देय्या थीथी बहाः बहीया खुगू गुंला बाजं खलकं ब्वति काःगु खः ।
येँ महानगरपालिकाया उपप्रमुख सुनिता डंगोलं ज्याझ्वःया उलेज्या यासें नखःचखःलिसें सांस्कृतिक, परम्परागत महत्वया अमूर्त सम्पदाया रुपय् दयाच्वंगु बाजंया नं संरक्षण, संवद्र्धन याना वनेमाःगु खँय् बः बियादिल ।
लिपांगु इलय् बाजं थाइपिनिगु पुचःया ल्याः उल्लेख्य रुपं अप्वया वनाच्वंगु नापं मिसातय्गु नं सहभागिता उकथं हे अप्वया वनाच्वंगु खँय् लसता प्वंकादिसें थुकियात गर्वया रुपय् कायेमाः धयादिल ।
‘बाजंया संरक्षण व संवद्र्धनय् मिसातयगु नं भूमिका उतिकं महत्वपूर्ण जुइ, उकिं थुकियात पुस्तान्तरण याना यंकेमाःगु अतिकं आवश्यक जू’ उपप्रमुख डंगोलं धयादिल, ‘जब नखःचखः व बाजंया खँ जुइ व इलय् उकिया संरक्षण व संवद्र्धनया नं खः जुइ ।’
‘परम्परागत रुपं महत्वपूर्ण थज्याःगु सांस्कृतिक बाजनय् मिसातय्गु नं सहभागितां उकिया संरक्षणया जिम्मेवारी मिसातय्सं नं बहन याये फइ धइगु स्पष्ट याः’, वय्कःया धापू दु ।
उपप्रमुख डंगोलं थौंकन्हय् नखःचखः, जात्रापर्व, संस्कृतिलिसें बाजं जक मखसे स्वनिगःया बहाः बही, चुक, ननिया संरक्षणलिसें अन जुइगु पुजाआजायात नं पुस्तान्तरण याना यंकेमाः धयादिल ।
ज्याझ्वःया सभापतिया थासं येँ महानगरपालिका २१ वडाअध्यक्ष उदय चुडामणि वज्राचार्यं सांस्कृतिक महत्वया बाजं संरक्षणया निंतिं वडापाखें फक्व ग्वाहालि यायेगु प्रतिवद्धता प्वंकादिल ।
येँ महानगरपालिकाया पुलांम्ह प्रमुख विद्यासुन्दर शाक्यं गुंला बाजं थेंज्याःगु धार्मिक, सांस्कृतिक महत्वं जाःगु बाजं ब्वज्यां आत्मीयता अप्वयेकेगु नापं समन्वयात्मक भूमिका नं म्हितेत ग्वहालि जुइगु विश्वास प्वंकादिल ।
कीर्तिपूण्य महाविहार गुंला बाजं खलः व्यवस्थापन समितिया न्वकु ठूलोराजा शाक्यं लसकुस यासें प्राचीन कपिलवस्तुइ जुजु शुद्धोधनया पालंनिसें थायेगु याना वयाच्वंगु व भगवान बुद्धयात तसकं याःगु थ्व गुंला बाजं अर्थात धाःबाजं गुलि पुलां धइगु स्पष्ट जू धयादिल । ज्याझ्वलय् कीर्तिपूण्य महाविहार बाजं खलः (लगं) चारुमती गुंला बाजं खलः –चाबही) धर्मचक्र महाविहार गुंला बाजं खलः (वतु) कीर्तिपूण्य महाविहार गुंला बाजं खलः (क्वहिति), रत्नमण्डल महाविहार गुंला बाजं खलः, (नःघः) व केशचन्द्र गुंला बाजं खलः (इतुंबहाः)पाखें धाःबाजं ब्वज्या याःगु खः ।
LEAVE YOUR COMMENTS