नेपाःया निंतिं भारतीय विस्तारवाद दकलय् खतरा

ख्वप- ख्वप नगरपालिकाया प्रमुख सुनिल प्रजापतिं भारतीय विस्तारवादय् दकलय् ग्यानापुगु खँ धयादीगु दु । भारत निर्भरतायात अन्त्य याये मफुतले नेपाःया राजनीतिक व व्यापारिक स्वतन्त्रता नां जकया जुइगु नं वय्कलं धयादीगु दु ।

नगरप्रमुख प्रजापतिं थुगु खँ नेपाल अण्डा उत्पादक संघया झिंखुक्वःगु तःमुँज्याया उलेज्या यासें मूपाहां थासं धयादीगु खः । वय्कलं सरकारं वंगु पुस लिपांगु वाःपाखे कृषि क्षेत्रय् लगानी दुकायेगु धकाः याःगु निर्णयं कृषि क्षेत्र जक मखसे दक्वं लागा थौं तहसनहस जुइधुंकूगु धासें उकियात व्यापक सुधार यायेमाःगु आवश्यक जूगु धयादिल ।

ज्याझ्वलय् विशेष पाहांकथं झायादीम्ह भक्तपुर उद्योग वाणिज्य संघया वरिष्ठ उपाध्यक्ष शिवप्रसाद मानन्धरं व्यावसायिक एकता थौंया आवश्यकता व अपरिहार्यता जूगु खँय् बः बियादिसें व्यापारी व स्थानीय सरकार सहकार्य याना वनेमाःगु दु धयादिल ।
संघया पुलांम्ह अध्यक्ष विनोद पोखरेलं ताः ईतकया संघर्ष लिपा थगुने ख्येंया भाः क्वःछीत ताःलाःथें आः खायात नकेगु दाना व खाचाया मू नं स्पष्ट जुइमाः धयादिल ।

नेपाल कुखुरा उत्पादक संघया पुलांम्ह अध्यक्ष राजु अधिकारीं वास्तविक व्यवसायीत सरकारी अनुदानपाखें बञ्चित जुयाच्वंगु तर, कागजी व्यवसाय याइपिंसं उकिया लबः कायेत ताःलानाच्वंगु गुनासो यानादिल ।

संघया केन्द्रीय अध्यक्ष शिवराम केसीया सभापतित्वय् जूगु ज्याझ्वलय् काभ्रे शाखाया अध्यक्ष राधाकृष्ण अधिकारी, येँ जिल्ला अध्यक्ष अमरसिंह कट्टेल, रमेश चित्रकार लगायत थीथी जिल्लाया प्रतिनिधिपिंसं नं नुगःखँ तयादीगु खः ।