नेपाल पुचः न्हूगु हे पार्टीपाखे
येँ- नेकपा एमालेया अध्यक्ष केपी शर्मा ओलीं एकःति रुपं थःगु पुचःया जक केन्द्रीय कमिटीया बैठक सःताः विधान संशोधन यायेगु लिसें माधव नेपाल पक्षयात थीथी द्वपं बीगु ज्या यानां तुं च्वंगु कारणं एमालेया एकता सम्भव मदुगु खँ नेपाल पुचःया नेतातय्सं धाःगु दु ।
थौंकन्हय् एमालेया वरिष्ठ नेता माधव नेपालं थःगु पक्षया नेतात लिसे सहलह यायेगु झ्वलय् उगु खँ धायेगु यानाच्वंगु दु । वय्कलं म्हिगः नं थःगु पक्षया नेतात लिसे सहलह यायेगु झ्वलय् आः अध्यक्ष ओलीलिसे थःपिं नापं वनेगु सम्भावनाया अन्त्य जूगु खँ स्पष्ट रुपं धयादीगु खः ।
वंगु बुधवाः नं स्थायी कमिटीया बैठकय् नेता नेपालं थ्वहे खँ धयादीगु खःसा आः थ्वयां लिपा पार्टी दुने विद्रोह यानाः मेगु पार्टी चायेकेगु बाहेक मेगु विकल्प मदु धकाः नं कार्यकर्तातय्त धयादीगु खँ सूत्रं धाःगु दु ।
पार्टी अध्यक्ष केपी ओलीं आः थःपिं फयांफछि पार्टीइ मवःसां जिउ धइथेंज्याःगु व्यवहार क्यनाच्वंगु धासें ओली पुचःलिसे जूगु झिगू बुँदे सहमतिया आधारय् सम्मानजनक एकता यायेगु खँयात नं अध्यक्ष ओलीं ध्यान मबियाच्वंगुलिं आः थःपिं न्हूगु हे पार्टी गठन यानाः वनेमाःगु आवश्यकता वयाच्वंगु दु धकाः स्पष्ट यानादीगु खँ सूत्रं धाःगु दु ।
पार्टी अध्यक्ष ओलीं वंगु साउन २५ गते थःगु पक्षया केन्द्रीय कमिटीया बैठक च्वनाः विधान संशोधन यासें थःत अझ शक्तिशाली याःगु जक मखुसें महाधिवेशनं अध्यक्ष छम्ह जक निर्वाचित यानाः मेपिं पदाधिकारीत मनोनित यायेगु धकाः तयार याःगु व्यवस्थायात नं माधव नेपाल पक्षं विरोध यानाच्वंगु दु ।
पार्टीया नेतातलिसे जूगु खँल्हाबल्हाय् नेता नेपालं धयादीगु दु, ‘ओलीं छम्ह जक अध्यक्ष तयाः निर्वाचन यायेगु व मेपिं मनोनित यायेगु खँ धयाच्वन, थ्व निरंकुश व तानाशाही दयेकेगु, जनताया बहुदलीय जनवादया मूल मर्मय् प्रहार यायेगु ज्या यात । थुकिं एकताया कुतः अन्त्य जूगु दु, आः अन्तरसंघर्षया औचित्य मन्त, न्हूगु ढंगं वनेमाःगु आवश्यक जुल । एकताया नामय् पियाः ई सितिं छ्वयेगु जुइ मखु, छु यायेगु धइगु बारे सहलह याये नु, आः विद्रोह बाहेक मेगु विकल्प मदु ।’
LEAVE YOUR COMMENTS