चेल्सीं सुपर कपया उपाधि त्याकल

एजेन्सी- चेल्सीं युइएफए सुपर कपया उपाधि त्याकूगु दु । बिहिवाः सुथय् जूगु कासाय् इंग्लिस क्लब चेल्सीं स्पेनिस क्लब भिल्लारियलयात पेनाल्टीइ सुटआउटय् ६–५ गोलं बुकाः सुपर कपया उपाधि त्याकूगु खः । क्वःछिनातःगु ९० मिनेट व लिपा तंगु एस्कट्रा टाइमय् निगूलिं टिमं छगू छगू गोल याःगु खः ।

कासाय् चेल्सीया हाकिम जियाचं न्हापागुं हाफया २७ औं मिनेटय् गोल यानाः चेल्सीयात अग्रता बिउगु खःसा निगूगु हाफया ७३ औं मिनेटय् भिल्लारियलया निंतिं जेरार्ड मोरिनों बराबरी गोल यात । पेनाल्टी सुटआउटय् भिल्लारियलया गोलकिपर सर्जियो एसेन्जों चेल्सीया न्हापांगु पेनाल्टी पंगु खःसां चेल्सीं मेगु दक्व पेनाल्टीइ गोल याःगु खः । चेल्सीया गोलकिपर केपां भिल्लारियलया निगू पेनाल्टीयात पंनाबिउगु खः ।

युइएफए सुपर कपया उपाधि च्याम्पियन्स लिग विजेता व युरोपा लिग विजेता दुथुइ जुइगु धेंधेंबल्ला खः । चेल्सीं च्याम्पियन्स लिग विजेता खःसा भिल्लारियलं युरोपा लिग त्याकूगु खः । चेल्सीं म्यानचेस्टर सिटीयात बुकाः च्याम्पियन्स लिग उपाधि त्याकूगु खः । अथे हे भिल्लारियलं म्यानचेस्टर युनाइटेडयात बुकाः युरोपा लिग त्याकूगु खः ।