किपूया मेयर–उपमेयर एमालेया ओली पक्षय्

किपू- किपू नगरपालिकाया मेयर भाजु रमेश महर्जनं थःपिं नेकपा (एमाले) दुने केपी ओलीया पक्षय् च्वनागु खँ स्पष्ट यानादीगु दु । म्हीग किपुली जूगु छगू ज्याझ्वलय् न्ववासें वय्कलं थः लगायत किपू नगर–पालिकाय् निर्वाचित जनप्रतिनिधित एमाले दुने ओली पक्षय् दुगु खँ स्पष्ट यानादीगु खः ।

केपी ओली प्रधानमन्त्री जुयाच्वंगु इलय् वय्कलं यानादीगु संसद भंग विरुद्ध मेयर रमेश महर्जन लगायतया जनप्रतिनिधितय्सं मसाल जुलुस समेत पिकाःगु खः । तर लिपांगु इलय् माधव नेपाल पुचलं कांग्रेसया सभापति शेरबहादुर देउवायात प्रधानमन्त्री दयेकेत भोट बिउगु कारणं थःपिं नेपाल पक्षय् च्वने मफइगु खँ कनादिल ।

उगु भेगया सांसद कृष्णगोपाल श्रेष्ठ मूपाहां कथं झाःगु उगु इलय् येँ मनपाया मेयर विद्यासुन्दर शाक्य, किपू भेगया वाम नेता शम्भुराम महर्जनया नं उपस्थिति दुगु खःसा ज्याझ्वलय् किपू नपाया उपमेयर सरस्वती खड्कां लसकुस यानादीगु खः । ज्याझ्वलय् किपूया मेपिं नं जनप्रतिनिधिपिनि उपस्थिति दुगु खः ।