ने. सं. ११४४ कौलाथ्व तृतीया -

किपुलिइ उद्घोषण तालिम क्वचाल

किपू – किपू नगरपालिका वडा नं. १ या ग्वसालय् न्ह्यानाच्वंगु उद्घोषणा तालिम क्वचाःगु दु । वडाया ग्वसालय् स्ववाःयंकंया उगु तालिम जूगु खः । किपू नपा १ वडाअध्यक्ष हर्ष महर्जनया सभापतित्वय् न्ह्याःगु ज्याझ्वलय् मूपाहांकथं किपू नगरपालिकाया प्रमुख रमेश महर्जन व विशेष पाहांकथं उपप्रमुख सरस्वति खड्का झायादीगु खः ।

मूपाहां नगर प्रमुख महर्जनं, विशेष पाहां उपप्रमुख खड्का, वडा नं. ६या वडाअध्यक्ष न्हुछेबहादुर महर्जनं तालिमया थीथी पक्षयात कयाः नुगःखँ तयादीगु खःसा प्रशिक्षार्थीपिंसं नं तालिमय् थःपिंसं सयेकागु ज्ञानया बारे कनादीगु खः ।

नीछन्हुतक न्ह्याःगु तालिमय् मुक्कं २२ म्ह प्रशिक्षार्थीं तालिम कयादीगु खःसा उगु तालिम पुलांम्ह मिस नेवाः सुनिता डंगोलं बियादीगु खः । किपू २ वडाअध्यक्ष रमेशमान डंगोल, ३ वडाअध्यक्ष राजेन्द्र महर्जन, ६ वडाअध्यक्ष न्हुछेबहादुर महर्जन, ९ वडाअध्यक्ष गंगाराम महर्जन, १० वडाअध्यक्ष अमन महर्जनया नं उपस्थिति दुगु तालिम समापन ज्याझ्वलय् प्रशिक्षार्थी व म्येँ हालामि राजेश महर्जनं सांगीतिक प्रस्तुतिलिसें हुलाप्याखं न्ह्यब्वयादीगु खः ।

थुकथं हे वडा नं. ९ लय् न्ह्यानाच्वंगु उद्घोषण तालिम नं क्वचाःगु दु । झिन्हुयंकंया तालिम समापन ज्याझ्वलय् मूपाहांकथं झायादीम्ह किपू नगरपालिकाया उपप्रमुख सरस्वति खड्कां प्रशिक्षार्थीतय्त दसिपौ लःल्हानादीगु खः ।

२५ म्हेसिनं ब्वति कयादीगु तालिम अनिता महर्जन, विरेन्द्र शाक्य, जमुना नकःमि व नन्दकुमारी महर्जनं बियादीगु खः । वडास्तरय् महिला संजाल ९ वडाया अध्यक्ष संगीता महर्जनया सभापतित्वय् जूगु समापन ज्याझ्वलय् मूपाहां, विशेष पाहां ९ वडाअध्यक्ष गंगाराम महर्जन, प्रशिक्षार्थीपिंसं नुगःखँ तयादीगु खः ।