आयुसंस्कार परित्याग दिवसयात कयाः सहलह

येँ(नेपालभाषा टाइम्स)- दँय्दसं पोहेलाथ्व पुन्हि, (सिल्लापुन्हि)यात बौद्धमार्गी व बौद्ध धर्मावलम्बिया अनुयायीतय्सं आयुसंस्कार परित्याग दिवसया रुपय् हना वनावयाच्वंगु दु । शाक्यमुनि सिद्धार्थ गौतम बुद्धं थम्हं महापरिनिर्वाण अर्थात मृत्यु प्राप्त याइगु दिं घोषणा याःगु दिंयात कयाः विश्वन्यंकंया बौद्ध धर्मया अनुयायीतय्सं थ्व दिवस हना वयाच्वंगु दु ।

थ्व हे झ्वलय् थनया वसन्तपुलिइ च्वंगु श्रीखण्ड तरुमुल महाविहार (सिख्वंमू बहाः)या ग्वसालय् आयुसंस्कार परित्याग दिवसयात कयाः छगू सहलह ज्याझ्वः जुल । बौद्ध धर्मलिसे सम्बन्धित महाविहार, विहार, थीथी खलः, पुचः, संघसंस्था, निकायलिसें बाजं खलःलिसे उगु सहलह याःगु खः ।

शाक्यमुनि भगवान बुद्धया जन्म, सम्बोधि लाभ व महापरिनिर्वाण त्रिसंयोग प्राप्त यानाबिज्याःगुं स्वांयाःपुन्हिया दिंयात विश्वन्यंकंया समग्र बौद्ध धर्मया अनुयायी व बौद्ध धर्मावलम्बितय्सं तःजिक हना वयाच्वंसां थुकथं हे महत्वं जाःगु आयुसंस्कार परित्याग दिवस धाःसा ध्याकुनय् लानाच्वंगुलिं थ्व दिंयात नं उतिकं महत्व बियाः हनेमाःगु आवश्यक दुगु सहलह ज्याझ्वलय् नवानादीपिं वक्तातय्सं धाःगु दु ।

सहलह ज्याझ्वलय् नवानादीपिं वक्तातय्सं बुद्धया आयुसंस्कार परित्याग दिवसयात जनस्तरं जक मखसे राज्यं नं तसकं महत्व बियाः व्यापक रुपं थ्व हनेगु निंतिं प्रोत्साहित यायेमाःगु विचाः तयादीगु खः । आयुसंस्कार परित्याग दिवस देशय् दुने जक मखसे विश्वन्यंकंया बौद्ध धर्मावलम्बितय्सं नं थ्व दिवसया महत्व व औचित्ययात कयाः प्रचार प्रसार जुइकथं अने फत व अन्तर्राष्ट्रिय ख्यःया विज्ञतय्नं दुथ्याके फत धाःसा अझ बांलाइगु व स्वांयाःपुन्हि थें झः झः धाये हने फइगु विश्वास वक्तातय्सं प्वंकादीगु दु ।

ज्याझ्वलय् श्रीखण्ड तरुमुल महाविहार संरक्षण तथा संचालक समितिया अध्यक्ष दिल्लीरत्न शाक्यं आयुसंस्कार परित्याग दिवस भव्य रुपं हनेगु निंतिं थःपिनिगु थासं फक्व ग्वाहालि यायेत तयार दुगु व दक्व खलःपुचःलिसें सकसिनं थःथःगु थासं ज्याझ्वः भव्य रुपं सफल यायेत इनाप यानादिल ।
सदांथें थुगुसी नं भगवान बुद्धया मूर्तियात विशेष रुपं छाय्पियाः येँ देय्या दुनेया थीथी लागाय् शोभा यात्रा यानाः थ्व दिवस तःजिक हनीगु जुयाच्वंगु दु ।