नेवाः समुदाय जक मखु राष्ट्रियता हे खः : श्रेष्ठ
येँ – संघीय समाजवादी फोरम (ससफो) नेपालया सहअध्यक्ष राजेन्द्र श्रेष्ठं नेवाःत मात्र छगू समुदाय जक मखसे राष्ट्रियता हे जूगु खँ धयादीगु दु । लिसें वय्कलं गोर्खा राज्य विस्तार जुइ न्ह्यः मालेगु झ्वलय् थन वयाः च्वनच्वंपिं जातित, थन तक कि इराकं वयाः च्वनाच्वंपिं मुस्मांत तकं ‘नेवाः मुस्मां’ धायेकाः च्वनाच्वंगु धयादीगु दु ।
प्रतिनिधिसभा सदस्य तकं जुयाच्वनादीम्ह ससफो नेपालया सहअध्यक्ष श्रेष्ठं उगु खँ येँ महानगरपालिका २५ वडा कमिटीया वंगु शनिवाः जूगु अधिवेशनया उलेज्या यासें धयादीगु खः । मिथिला, सेन राज्य, कपिलवस्तु थेंज्याःगु तराई–मधेसं तकं थन वयाः च्वनाच्वंपिंसं नं थनया भाय्, संस्कृति नाला कयाः नेवाःकरण जूगु धयादिल ।
‘तर आः वयाः थ्व प्रकरण अवरुद्ध जूगु दु’ सहअध्यक्ष श्रेष्ठं धयादिल, ‘उकिं हे झीसं आः थःगु पहिचानसहितया संघीयताया माग यानागु खः ।’
संघीय संसदया निगुलिं संसदपाखें स्थानीय तहं ‘प्लस टु’ तक मांभासं शिक्षा बीगु कथं विधेयक पारित जुइधुंकूगु सन्दर्भय् येँ महानगरपालिकायात नेपालभाषा ब्वनेकुथि चायेकेत नं इनाप यानादिल ।
अधिवेशनय् विशिष्ट पाहाँकथं झायादीम्ह स्वास्थ्य तथा जनसंख्या मन्त्री सुरेन्द्रकुमार यादवं नेवाः व मधेस थवंथवय् परिपूरक खः धासें थःत नेवाः प्रदेशय् च्वनेबलय् गर्वया अनुभूति जुइगु धयादिल । नेवाः प्रदेशया जनतायात पुलांगु सत्तां शोषण व शासन याःगु धासें थ्वपाखें मुक्तिया निंतिं संघीय समाजवादी पार्टीलिसें फोरम नेपाल एकीकरण जूगु खः धयादिल ।
ससफो नेपाल समावेशी राष्ट्रिय पार्टी जूगु धासें पहिचान व अधिकारसहितया संघीयताया आन्दोलनय् आः उपेन्द्र यादव, अशोक राई, राजेन्द्र श्रेष्ठ थेंज्याःपिं बौद्धिक नेता दुगुलिं थ्व पार्टीं बाहेकं मेगु पार्टी याये फइमखु धासें पहिचान व संघीयता पक्षधर सकलें पार्टीइ संगठित जुइत इनाप यानादिल ।
ज्याझ्वलय् पार्टी केन्द्रीय सल्लाहकार समितिया प्रमुख डा. महेशमान श्रेष्ठ, केन्द्रीय दुजःपिं आङकाजी शेर्पा, लालबहादुर, तामांग, पवित्र वज्राचार्य, येँ जिल्लाया अध्यक्ष नापं वैकल्पिक केन्द्रीय दुजः मनरत्न शाक्य, येँ मनपा २५ वडाया अध्यक्ष नीलकाजी शाक्य लगायतं भिंतुना देछानादीगु खः ।
जिल्ला समितिया आपालं दुजःपिनिगु उपस्थिति दुगु अधिवेशनं मनोज कर्माचार्ययया अध्यक्षताय् झिंन्याम्हेसिया न्हूगु वडा कमिटी नं गठन याःगु खः । थ्व हे वइगु बैशाख २८, २९ व ३० गते स्वन्हुयंकं पार्टीया न्हापांगु एकता महाधिवेशन यायेगु तयारीकथं थौंकन्हय् देय्न्यंकं वडा, नगर व गां अधिवेशन यानाच्वंगु दु ।
LEAVE YOUR COMMENTS