ने. सं. ११४४ कछलागा सप्तमी -

कावा प्रमया न्ह्यःने विधेयक खुनाः नाराबाजी

येँ – येँय् जूगु राष्ट्रिय बालिका सम्मेलन छपुचः बाल अधिकारकर्मीतय् हाःहूया कारणं दथुइ हे बन्द याये माल । ज्याझ्वलय् मूपाहां कथं कार्यवाहक प्रधानमन्त्री ईश्वर पोखरेल उपलस्थित जुयादीगु खः । ज्याझ्वलय् ब्वति काः वयाच्वंपिं बाल अधिकारकर्मीतय्सं सरकारपाखें बाल श्रमयात मान्यता दइ कथंया विधेयक हयेत्यंगु धासें उकिया बारे स्पष्ट यायेत ग्वसाः खलःयात इनाप याःगु खः । तर ग्वसाः खलकं उकियात वेवास्ता यायेवं अन वयाच्वंपिं थ्व बालअधिकारकर्मीत दबुली हे थहां वनाः सरकारं हयेत्यंगु ‘बालबालिका सम्बन्धी विधेयक–२०७५’ झ्यारझुर खनाः वांछ्वया बिउगु खः ।

अधिकारकर्मीतय्सं विधेयक खुनाः वांछ्वःगु इलय् कावा प्रम पोखरेल लिसें ग्वसाः खलःया पदाधिकारीपिं दबुली तुं वाताहाँ जुयाच्वंगु खः ।
अधिकारकर्मीतय्सं दबुली थहां वनाः ‘बाल सम्मेलन मूर्दावाद’, ‘डलरखेती याये दइ मखु’, ‘एनजीओत मूर्दावाद’ धकाः नाराबाजी नं याःगु खः ।
कञ्चनपुरय् निर्मला पन्तयात बलात्कार यानाः स्याना बिउगु काण्डय् आः तक अपराधी ज्वने फयाच्वंगु मदु धासें उमिसं पन्तया न्याय माल धकाः द्वलंद्वः मनूत सतकय् कुहां वःगु इलय् थ्व कार्यक्रमया आयोजकत गन वनाच्वन धकाः न्ह्यसः नं तःगु खः ।

कार्यक्रमय् नाराबाजी जुइवं कावा प्रम पोखरेल लिसें ग्वसाः खलःया दुजःपिंत प्रहरीं सुरक्षा बियाः राष्ट्रिय सभागृहं पित यंकूगु खः ।
वयां लिपा सञ्चारकर्मीतलिसे खँ ल्हासें प्रदर्शनकारीतय्सं आः दयेकूगु विधयेकय् १४ दँ दुपिं मस्तय्त नं बाल श्रम याकूसां जिउ धकाः च्वयातःगु खँ धाःगु दु । थुकिं बालश्रमयात हानं प्रश्रय बीगु दावी नं उमिसं यात । कावा प्रमया न्ह्यःने विधयेक खुनाः प्रदर्शन यायेगु थ्व ज्याय् बाल अधिकारया लागिं सक्रिय जुयाच्वंपिं प्रविण सिलवाल, धिरेज जोशी, राजाराम बस्नेत, आकृति खड्कापिं लगे जूगु खः ।

ज्याझ्वलय् थीथी बोर्डिङ स्कूलय् आखः ब्वनीपिं मिसा मस्तय्त हयाः न्ह्यःने तःगु व सरकारी स्कूलय् आखः ब्वनीपिं मस्तय्त वेवास्त याःगु द्वपं नं उमिसं बिउगु दु । उमिसं नाराबाजी याःबलय् सभागृहया हल तसकं तनावपूर्ण जूगु खः ।