ने. सं. ११४३ ञलाथ्व चतुर्दशी -

गुथिया जग्गा छ्यलाः सरकारं ध्यबा मपू

येँ – संस्कृति संरक्षणया निंतिं दातापिंसं तयाथकूगु चलअचल सम्पत्तिया हकभोग याःगु वापत सरकारं गुठी संस्थानयात पुलेमाःगु ध्यबा अर्बौं तका थ्यंगु दु । थ्व ध्यबा सरकारं इलय् हे मबिउगु धासें गुठी संस्थानं अर्थ मन्त्रालयय् थःपिनिगु खँ तयेधुंकूगु खँ सीदुगु दु । गुठी संस्थानं २०२७ सालं निसें सरकारयाके कायेमाःगु बक्यौता जक १३ अर्ब ६५ करोड ७२ लाख तका थ्यनेधुंकूगु दु ।

संस्थानं थीथी झिंच्यागू शीर्षकय् सरकारं ध्यबा पुलेमाःगु खँ धाःगु दु । दकलय् अप्वः धनुषा जिल्लाया जनकपुर नगरपालिकाया थीथी सरकारी ज्याकुथिं उपभोग यानाच्वंगु तैनाथी गुथिया जग्गाया ११ अर्ब ४५ करोड सरकारं संस्थानयात पुलेमाःगु दु । थनया १७० रोपनी जग्गा सरकारं भोग यानाच्वंगु दु ।

अथेहे २०६६ पुस ६ गतेया मन्त्रिपरिषदया निर्णय कथं नन्दीकेशरी गुथि नक्सा येँया सोधभर्ना वापत १ अर्ब ५३ करोड तका सरकारयाके काये मानिगु दनि । अथेहे भुखाचं क्षति याःगु मठमन्दिर पुनर्निर्माण क्वचायेधुंकूगुया सोधभर्ना नं सरकारं मबिउनिगु खँ धाःगु दु । थज्याःगु कथंया ध्यबा ५ करोड २० लाख तका दु ।

अथे हे धोबिखोला सिफल तां गुथिया १ करोड, सोह्रखुट्टेय् प्रहरीं भोग याना वयाच्वंगु जग्गाया ९ करोड ७९ लाखया लिसें थीथी जात्रा पर्व चले यायेगु निंतिं गुठी संस्थान बेहोरे यायेधुंकूगु ध्यबा नं बक्यौता कथं ल्यं दनिगु खँ धाःगु दु । सरकारपाखें वयेमाःगु ध्यबा मवःगुलिं संस्थानं यायेमाःगु महत्वपूर्ण ज्या व लोप जुइधुंकूगु संस्कृतिया जगेर्ना यायेगु ज्या पंगः वयाच्वंगु खँ सहप्रशासन दीपकबहादुर पाण्डें कनादीगु दु ।

वय्कःया कथं सरकारयाके कायेमाःगु ध्यबा वल धाःसा व्यवसायिक रुपं लगानी यानाः गुठी संस्थानं चले यानाच्वंगु थीथी जात्रा पर्व सञ्चालन यायेगु ज्याय् अःपुइगु खँ धाःगु दु । वंगु छुं दँ न्ह्यवंनिसें सरकारं गुठी संस्थानया बजेट फ्यायेगु ज्या बन्द यायेधुंकूगु दुसा थःपिंसं आय आर्जन यायेगु ज्याय् नं सरकार थीथी पक्षं ग्वाहालि मयाःगुलिं जात्रा पर्व सञ्चालन यायेगु तकं समस्या जुयाच्वंगु दु ।

गुठी संस्थानया कथं देय्न्यंकं संस्थानया १५ हजार स्वयां अप्वः जग्गा दु । उकिया आपालं ब्व तराई लागाय् लाः । नेपाः थ्यंमथ्यं १२०० मठमन्दिर व गुम्बा दु । गुकी राजगुथि अन्तर्गत २३०० गुथि लगतय् दु । गुथि संस्थानं सरकारयाके कायेमाःगु बक्यौता बारे अर्थ मन्त्रालय लिसे खँल्हाबल्हा जुयाच्वंगु दुसा स्वन्ति नखः लिपा उकिया बारे निर्णय जुइफइगु खँ धाःगु दु ।