लोकसेवाया आयोगया लिखित परीक्षा स्थगित

येँ (नेपालभाषा टाइम्स) – लोकसेवा आयोगं कात्तिक १६ गते निसें कायेगु धयातःगु फुक्कं लिखित परीक्षा स्थगित याःगु दु। आयोगं सोमवाः छगू सुचं पितबिसें आयोगया कर्मचारीतय्त कोरोना संक्रमित जूगुलिं परीक्षा सम्बन्धी मू मू शाखा तकं बन्द यायेमाःगु अवस्था व परीक्षा बिउ वइपिं उम्मेदवारत नं संक्रमण जुइधकाः ग्यानाच्वंगु कारणं परीक्षा स्थगित यायेमाःगु खँ धयातःगु दु ।

आयोगं परीक्षा काःवनेमाःपिं कर्मचारीत हे आइसोलेसनय्ला नाच्वंगुलिं आयोगं कात्तिक १६ गते निसें काये धयातःगु निजामति, सुरक्षा निकाय व संगठीत संस्था पाखेया फुक्कं परीक्षा स्थगित यायेगु निर्णय यानागु खँ धयातःगु दु । थ्वयां न्ह्यव आयोगं कोरोना संक्रमित उम्मेदवारतय्त परीक्षा बीके मबिइगु निर्णय याःगु खःसा सर्वोच्च अदालतं संक्रमित जूम्ह उम्मेदवारयात नं माःगु व्यवस्था यानाः परीक्षा बीकेमाःगु फैसला न्यंकेगु आयोग परीक्षा कायेगु खँय् हे अन्योलय् लाःगु खः । आः आयोगं परीक्षा स्थगित याःगु छगू कारणं सर्वोच्च अदालतया फैसला नं जूगु खँ सीदुगु दु ।