वीरय् स्वास्थ्यकर्मीयात लाठीचार्ज

येँ – थःपिनिगु सेवा सुविधा लिसे थीथी न्यागू माग तयाः धर्ना बियाच्वंपिं वीर अस्पतालया स्वास्थ्यकर्मी व प्रमुख प्रशासकीय अधिकृत डा. जागेश्वर गौतम दथुइ सहलहया इलय् भनाभन जुइवं प्रहरीं लाठिचार्ज याःगु दु ।

वीरया कर्मचारीतय् कथं सहलहया झ्वलय् छुं भचा तनाव जुइवं डा. गौतम प्रहरी सःतूगु खः । प्रहरी बैठक जुयाच्वंगु थासं हे कर्मचारीतय्त पितिनेत याःगु लाठिचार्जय् लानाः न्याम्ह कर्मचारी घाःपाः जूगु दु । उमित म्हिगः वीर अस्पतालया हे आकस्मिक कक्षय् तयाः वासः याःगु खः । कर्मचारीतलिसे भनाभन जुइधुंकाः डा. गौतम प्रहरी सुरक्षा घेरां हे अस्पतालं पिहां वंगु खः ।

कर्मचारी युनियनं २०७७ साल भदौनिसें कोभिड भत्ता, असोज निसें सेवा विस्तार भत्ता व २०७७ सालया वासः न्यायेगु भत्ता माग यानाः धर्ना च्वंगु खः । कर्मचारीतय्सं अस्पतालय् जुयाच्वंगु अनियमिततायात कयाः छानविन यायेमागु आदि माग नं तयाच्वंगु खः ।

कर्मचारीपिसं थौं नं थःपिनिगु धर्ना निरन्तर जुइगु खँ धाःगु दु । मेखे म्हिगः हे वीर अस्पतालया नेपाल स्वास्थ्यकर्मी संघं छगू विज्ञप्ति पिकयाः डा. गौतम लिहां मवंतले व प्रहरीं माफी मफ्वंतले कडा आन्दोलनय् कुहां वयेत थःपिं बाध्य जुइ धाःगु दु ।

सम्बन्धित बुखँ

LEAVE YOUR COMMENTS