लन्दनं भारत वःगु उडानय् कोरोना संक्रमित

एजेन्सी – लन्दनं भारतय् वःगु छगः जहाजय् खुम्ह यात्रीतय्के कोरोना भाइरस लुइकूगु दु । सोमवाः न्हिनय् थ्यंकेहःगु एयर इन्डियाया जहाजय् च्वनावःपिं यात्रुतय् परीक्षण यानास्वःबलय् खुम्ह यात्रीयाके संक्रमण खनेदुगु खः । अथेहे कोलकता वःगु मेगु छगू जहाजय् च्वनावःपिं यात्रुत मध्ये निम्हेसिके नं कोरोना संक्रमण खनेदुगु खँ धाःगु दु ।

बेलायतय् कोरोनाया न्हूगु ताजिया भाइरस संक्रमण जुयाच्वंगुलिं युरोपया थीथी देशय् बेलायतं वइगु उडानय् प्रतिबन्ध तयातःगु दु। बेलायतय् खनेदयाच्वंगु न्हूगु भाइरसयात कयाः विश्वन्यंक. चिन्ता प्वंका वयाच्वंगु दु । भारतं नं आः थनिं निसें हे ३१ डिसेम्बर तकया निंतिं बेलायतं वइगु फुक्कं उडान रद्द यानाबीधुंकूगु दु ।

थ्व भाइरस लन्दन व दक्षिण पूर्वी इंग्ल्यान्डय् तच्वयेक न्यना वनाच्वंगु दु । थ्व भाइरस न्हापाया कोरोना भाइरस स्वयां ७० प्रतिशत याकनं न्यना वनेफुगु खँ धाःगु दु । अथेखःसां थ्व न्हूगु भाइरसया कारणं गम्भीर लक्षण धाःसा खनेदुगु मदुनि । अथेहे थ्व न्हूगु भाइरसय् आः विकसित जूगु खोपं छु असर याइ धयागु नं स्पष्ट रुपं सीमदुनि धाःगु दु ।