थःगु रिट थःपिंसं हे लिछ्यात

येँ -माओवादी त्वःताः एमाले जूवंपिं प्यम्ह सांसदतय्सं थःपिं अझ नं माओवादी हे खःनि, उकिं थःपिनिगु सांसद पद कायम यायेमाः धइगु माग यासें सर्वोच्चय् दायरयाःगु रिटय् म्हिगः नं सुनुवाई मजुल ।

म्हिगः थुकिया बारे न्यायाधीश आनन्दमोहन भट्टराईया इजलासय् वहस यायेगु धकाः पेसी तोके यायेधुंकूगु खःसां निवेदक पक्षया कानून व्यवसायीतय्गु हे इनाप कथं म्हिगः वहस लिछ्याःगु खः । आः थ्व वहस गबले जुइ धइगु निश्चित मजूनि ।

माओवादी त्वःताः एमाले जूवंपिं नेतात लेखराज भट्ट, टोपबहादुर रायमाझी, प्रभु साह व गौरीशंकर चौधरीं थःपिं एमालेय् दुहां वनागु मदुनि, उकिं माओवादीपाखें थःपिंत सांसद पद हे गुमे जुइक कारवाही याःगु पाय्छि मजू धासें थ्व रिट दायर यानादीगु खः । वय्कःपिं प्यम्हं ओलीया सरकारय् मन्त्री जू वंपिं खः । वयां लिपा माओवादी पार्टीं उमिगु सांसद पद खारेज यायेत पौ च्वया छ्वयेवं उपिं पदमुक्त जूगु खः । तर लिपा सर्वोच्च अदालतया आदेशं उमिगु मन्त्री पद नं हनन जुइवं उपिं उखे नं मलाः थुखे नं मलाः जूगु खः ।
थ्व प्यम्हं नेतात माओवादी दुने नं अतिकं चलखेल याइपिं नेताया रुपय् परिचित जुयाच्वंपिं खः । उमिसं थःपिंत एमाले नं धायेगु मयाः ।