ल्हातय् लाःगु स्मार्ट लाइसेन्स नं ज्या मवः

येँ – यातायात व्यवस्था विभागं वितरण याःगु स्मार्ट लाइसेन्स गुणस्तरहीन जूगु खँ सीदुगु दु । स्मार्ट लाइसेन्सय् किपा व नां सीमदुगुलिं स्मार्ट लाइसेन्स काःवःपिं सर्वसाधारण निराश जुयाच्वंगु दु ।स्वक्वःखुसी थःगु लाइसेन्स वःगुलिं लय्ताःम्ह ख्वपया समीर बराल लाइसेन्स ल्हातय् लायेवं निराश जुइ माल ।

कारण, वय्कःया लाइसेन्सय् किपा छुं हे सीमदु । उकिं वय्कः उगु लाइसेन्स विभागयात हे लःल्हानाः लिहां वनेमाःगु खः । विभागं जारी याःगु आपालं धइथें लाइसेन्सय् थज्याःगु त्रुटि लूगु दु । गुलिखे लाइसेन्सय् नां तकं सीमदुगु खँ सम्बन्धित पीडिततय्सं धाःगु दु । किपा सीमदुगु लाइसेन्स वयाच्वंगु खँ कार्यालयया कर्मचारीतय्सं नं स्वीकार याःगु दु ।

थज्याःगु समस्या दुगु लाइसेन्स थःपिंसं इनेगु ज्या दिकागु खँ कार्यालय प्रमुख चेतप्रसाद उप्रेतीं कनादिल । अज्याःगु लाइसेन्स सेवाग्राहीयात बियां छुं अर्थ मदइगु जूगुलिं अज्याःगु लाइसेन्स वितरण यायेगु ज्या दिकागु जानकारी नं वय्कलं बियादिल ।

परीक्षा पास यायेधुंकूपिं ३ लाख स्वयां अप्वः जनतां स्मार्ट लाइसेन्स काये फयाच्वंगु मदु । यातायात विभागय् ७ लाख स्वयां अप्वःस्यां स्मार्ट लाइसेन्सया निंतिं राजश्व पुलेधुंकूगु दुसा ४ लाख लाइसेन्स जक छापे जूगु दु ।