निगू थासय् ज्या याइम्ह चिकित्सकयात कारवाहीया तयारी

येँ – सरकारं छगू हे इलय् निगू अस्पतालय् ज्या याइम्ह चिकित्सकयात कारवाही यायेगु तयारी याःगु दु । छगू हे इलय् सरकारी व निजी अस्पतालय् ज्या याइम्ह चिकित्सकतयात कारवाही यायेगु तयारी याःगु खः । मातृशिशु समाज नेपालया ग्वासलय् जूगु झिंछक्वःगु सम्मेलनया उलेज्या यासें जनसंख्यालिसें वातावरण मन्त्री लालबाबु पण्डितं उकथं छगू हे इलय् सरकारी व निजी अस्पतालय् ज्या याइम्ह चिकित्सकयात कारवाहीया दायराय् हयेगु ख्याच्वः बियादीगु खः । वय्कलं नेपाःया दक्वं तह व तप्काया नागरिकं स्वदेशय् हे उपचार यायेगु प्रण याइगु निजी क्षेत्रयात निषेध यायेगु मखसे उकियात प्रवद्र्धन व देशय् उत्कृष्ट स्वास्थ्य सेवा प्रदान याइगु चिकित्सा सेवा केन्द्र विन्दुया रुपय् स्थापित यायेगु जुइ धयादिल । स्वास्थ्य क्षेत्रया सुधारया निंतिं योजना दीर्घकालीन दृष्टिकोण, नवीनतायुक्त प्रस्ताव सुझाव सरकारयात बीत निजी ख्यःयात प्रोत्साहन यायेगु जुइ धासें मन्त्री पण्डितं धयादि, ‘सरकारं अस्पतालपाखें नं विश्वसनीय व गुणस्तरीय सेवा बी फइ ।’समृद्धिपाखे न्ह्याः वनेगु राष्ट्रिय अठोट पूवंकेत समाजया दक्वं वर्गपाखे उतिकं ग्वाहालि यायेमाः धासें भ्रुणया लिंग पहिचान मयायेगु प्रतिवद्धता नं चिकित्सकपाखें प्वंकेमाः धयादिल ।