च्याम्पियन्स लिग : म्यानचेस्टर व चेल्सी नकआउटय्

एजेन्सी- च्याम्पियन्स लिग अन्तर्गत मंगलवाः चान्हय् जूगु कासाय् समूह ‘इ’ या जर्मन क्लब बार्यन म्युनिखं झ्वलाकः न्यागू कासा त्याकेगु झ्वलय् युक्रेनयागु क्लब डेनामो किभयात २–१ गोलं बुकूगु दु । बार्यनया निंतिं रोबर्ट लेवान्डोस्की व किङ्सले कोमानं छगू छगू गोल याःगु खःसा डेनिस हरमासं डेनामो किभया निंतिं छगू गोल याःगु खः ।

पुचःया मेगु कासाय् स्पेनिस क्लब बार्सिलोनां पोर्चुगलया क्लब बेन्फिकालिसे गोलरहित बराबरी म्हितूगु दु । बराबरीलिपा बार्सिलोनां नकआउट चरण थाय् दयेकेत अन्तिम कासाया लिच्वः पिइमालीगु जूगु दु । बार्सिलोना व बेन्फिका निगुलिं टिमया सम्भावना ल्यंदनि । लिगया अन्तिम कासाय् बार्सिलोनां बार्यन म्युनिखलिसे व बेन्फिकां डेनामो किभलिसे म्हिती । थ्व पुचलय् समूह चरणया फुक्क कासा त्याकूगु बार्यन म्युनिख नकआउट चरणय् थ्यनेधुंकूगु दुसा डेनामो किभ लिगं पिने लायेधुंकूगु दु ।

समूह ‘एफ’पाखे इंग्लिस क्लब म्याचेस्टर युनाइटेडं स्पेनया भिल्लारियालयात २–० गोलं बुकाः नकआउट चरणय् थाय् दयेकल । युनाइटेडया निंतिं क्रिष्टियानो रोनाल्डो व जाडोन सान्चों छगू छगू गोल याःगु खः । युनाइटेडं मुख्य प्रशिक्षक ओल गुनार सोल्सायर बर्खास्त जूगुलिं अन्तरिम प्रशिक्षक माइकल क्यारिकया प्रशिक्षणय् थ्व कासा म्हितूगु खः । पुचःया मेगु कासाय् एटलान्टा व योङ ब्वाइजं स्वंगू स्वंगू गोलया बराबरी म्हितूगु दु । थ्व पुचलं नकआउट चरण वनीगु मेगु टिम नं अन्तिम कासाया लिच्वः लिपा जक सीदइ । पुचःया अन्तिम कासा म्यानचेस्टर युनाइटेड व योङ ब्वाइज दथुइ व भिल्लारियल व एटलान्टा दथुइ जुइ ।

समूह जी पाखें लिले साल्वर्गयात १–० गोलं व सेभियां वुल्फवर्गयात २–० गोलं बुकूगु दु । थ्व पुचःया छगू नं टिमं आःतक नकआउटय् थाय् दयेकूगु मदुनि । थ्व पुचलय् च्वंगु प्यंगुलि टिमयाके नकआउटय् थ्यनीगु सम्भावना दु । पुचःया अन्तिम कासा सेभिया व साल्वर्ग दथुइ व लिले व वल्फवर्ग दथुइ जुइ ।

अथेहे समुह एच पाखें नकआउट चरण थ्यने धुंकूगु इटालियन क्लब युभेन्ट्सयात बुकाः इंग्लिस क्लब चेल्सीं नं नकआउट थाय् दयेकल । चेल्सीं युभेन्ट्सयात ४–० गोलं बुकूगु खः । चेल्सीया निंतिं ट्रिभोअ चालोवाह, रिस जेम्स, कलुम हड्सन ओडोइ व टिमो वेर्नर गोल याःगु खः । थ्व पुचःया मेगु कासाय् माल्मो व जेनिथ सेन्ट पिटर्सवर्गं छगू छगू गोलया बराबरी म्हितूगु खः ।

सम्बन्धित बुखँ

LEAVE YOUR COMMENTS