ने. सं. ११४३ चौलाथ्व सप्तमी -

देउवाया सरकारय् मन्त्री ल्ययेत सकस

येँ – सत्तारुढ गठबन्धनं मन्त्रालयया भागबन्डा यायेगु जिम्मा शीर्ष तहया नेतापिंत बिउगु दु । म्हिगः वालुवाटारय् च्वंगु बैठकं मन्त्रालयया भागबन्डा क्वःछीगु जिम्मा शीर्ष नेतापिंत बिउगु खः । बैठकं न्यूनतम मंकाः ज्याझ्वः याकनं तयार यायेत पूर्णबहादुर खड्काया नेतृत्वया कार्यदलयात निर्देशन नं बिउगु दु ।

म्हिगःया बैठकय् कांग्रेसपाखें प्रधानमन्त्री तथा सभापति शेरबहादुर देउवा, वरिष्ठ नेता रामचन्द्र पौडेल, महामन्त्री पूर्णबहादुर खड्का व कृष्णप्रसाद सिटौला ब्वति कयादीगु खःसा माओवादी केन्द्रपाखें अध्यक्ष पुष्पकमल दाहाल व नारायणकाजी श्रेष्ठं ब्वति कयादीगु खः ।

उकथं हे जनता समाजवादी पार्टीपाखें संघीय परिषद्या अध्यक्ष डा. बाबुराम भट्टराई, अध्यक्ष उपेन्द्र यादव व अशोक राईपिंसं ब्वति काःगु खःसा राष्ट्रिय जनमोर्चापाखें अध्यक्ष चित्रबहादुर केसी व दुर्गा पौडेलं ब्वति काःगु खः । बैठकय् माधव नेपालपाखें विजय पौडेलं ब्वति काःगु खः ।

बैठकय् नेपाल पुचलं थौंकन्हय् पार्टी एकताया निंतिं कुतः जुयाच्वंगुलिं तत्काल सरकारय् ब्वति मकायेगु खँ धाःगु खः । वंगु असार २९ गते प्रधानमन्त्री नियुक्त जुइधुंकाः प्रम देउवां मन्त्रिपरिषद्यात पूर्णत बी मफयाच्वंगु खःसा जसपाया आधिकारिकताया विवाद ज्यनेवं आः मन्त्रिपरिषदं पूर्णता काइगु खँ धाःगु दु ।

बैठकय् प्रधानमन्त्री शेरबहादुर देउवां गठबन्धनया नेतृत्वयात याकनं हे मन्त्री जुइपिनिगु नां धलः बीत इनाप यानादीगु खः । वय्कलं मन्त्रिमण्डल पूर्णता बीत थाकुगुलिं थःप्रति न्ह्यसः ब्वलंगु धासें याकनं नां क्वःछीत इनाप यानादीगु खँ सूत्रं धाःगु दु । लिसलय् गठबन्धनया नेतृत्वपिंसं छन्हु निन्हुया दुने मन्त्री जुइपिनिगु नां धलः बीगु बचं बिउगु सीदुगु दु ।

गठबन्धनपाखें देउवाया आलोचना
सत्ता गठबन्धनया म्हिगः च्वंगु बैठकय् प्रधानमन्त्री देउवाया ज्यायात कयाः आलोचना जूगु दु । खास यानाः प्रम देउवां व्यवसायी उमेश श्रेष्ठयात स्वास्थ्य राज्यमन्त्री दयेकूगु खँय् नेतातय्सं असन्तुष्टी प्वंकूगु खः । श्रेष्ठयात गठबन्धनया नेतातलिसे सल्लाह मयासे राज्यमन्त्री दयेकूगु धासें नेतातय्सं असन्तुष्टि प्वंकूगु खः । राष्ट्रिय जनमोर्चाया अध्यक्ष चित्रबहादुर केसी देउवां सरकारय् वनेवं गल्ती याःगु धासें आपत्ति प्वंकादीगु खः । केसीया धापूयात समर्थन यासें माओवादी उपाध्यक्ष नारायणकाजी श्रेष्ठं नं सरकारयात गुगुं कथंया गल्ती यायेगु छुट मदु धासें धयादिल । नेतापिनिगु आक्रोश व सुझाव न्यनेधुंकाः प्रम देउवां थम्हं थप गल्ती मयायेगु प्रतिवद्धता प्वंकुसें धयादिल, ‘गल्ती जुइधुंकल, आवंनिसें अज्याःगु गल्ती मयायेगु जुइ, जिं बिचाः याये ।’