निगू प्रदेशया प्रमुखत चीकल

येँ – सरकारं लुम्बिनी प्रदेशया प्रदेश प्रमुखय् अमिक शेरचन व गण्डकी प्रदेशय् पृथ्वीमान गुरुङयात नियुक्ति यायेगु नितिं राष्ट्रपति विद्यादेवी भण्डारीयात सिफारिस याःगु दु । म्हिगः च्वंगु मन्त्रिपरिषद बैठकं निगू प्रदेशया वर्तमान प्रदेश प्रमुखत चीकाः न्हूगु नियुक्ति यायेत्यंगु खः ।

थ्व स्वयां न्ह्यः पुलांम्ह प्रधानमन्त्री केपी ओली सरकारं गण्डकीइ अमिक शेरचनयात प्रदेश प्रमुखं चीकाः सीता कुमारी पौडेलयात नियुक्त याःगु खः । म्हिगः च्वंगु मन्त्रिपरिषदया बैठकं आः अन पौडेलयात चीकाः शेरचनयात नियुक्त यायेगु निर्णय याःगु खः ।

बैठकं शुरुइ लुम्बिनी प्रदेश प्रमुख धर्मनाथ यादवयात चीकाः शेरचनयात नियुक्त याःगु खः । तर संविधान कथं छगू हे प्रदेशय् छम्ह हे मनू छक्वलं अप्वः प्रमुख जुइ मदइगु जूगुलिं शेरचनयात लुम्बिनी प्रदेशय् छ्वःगु खः । संविधानया धारा १६३ (४) कथं छम्ह हे मनू छक्वलं अप्वः छगू हे प्रदेशय् प्रमुख जुइ मदइगु व्यवस्था दु ।

सरकारं प्रदेश २ या प्रमुख डा. राजेश झा अहिराजयात नं चीकेगु तयारी याःगु दु । अनया प्रदेश प्रमुखय् जसपाया मनू नियुक्त यायेगु सहमति गठबन्धन दुने जूगुलिं जसपां नां छ्वया हयेवं नियुक्त जुइ धाःगु दु ।

जसपां म्हिगः बैठक च्वनाः मन्त्रिमण्डलय् वनीपिनिगु नां क्वःछीत तयारी याःगु खःसां नांया बारे निर्णय याये मफयेवं थौं हाकनं बैठक च्वनेत्यंगु खँ धाःगु दु । उकथं हे सरकारं म्हिगः योजना आयोगया उपाध्यक्षय् डा. विश्व पौडेलयात नियुक्त याःगु दुसा दुजलय् रामकुमार फुँयाल व दिलबहादुर गुरुङ– यात नियुक्त याःगु दु ।

देउवा सरकारं आः पूर्ववर्ती ओली सरकारं राजनीतिक नियुक्ति यानातःपिं फुकसित हे चीकेगु तयारी यानाच्वंगु खँ धाःगु दु । ओली सरकारं नियुक्तिया लागिं सिफारिस यानातःपिं ११ म्ह राजदूतया नियुक्ति खारेज याना बीधुंकूगु दु । भारत, चीन व अमेरिकाया वर्तमान राजदूत लित सःतेगु तयारी यानाच्वंगु खँ सूत्रं धाःगु दु ।

प्रमुख नियुक्तिइ राष्ट्रपतिया आपत्ति
देउवा सरकारं अमिक शेरचनयात प्रदेश प्रमुखय् नियुक्ति यायेगु तयारी यायेवं राष्ट्रपति कार्यालयं छम्ह हे मनू हाकनं उगु हे प्रदेशय् नियुक्त याये मजिउ धकाः सरकारयात सुझाव बिउगु खः ।

संविधानया व्यवस्था कथं प्रदेशसभाय् छगू हे कार्यकालय् प्रदेश प्रमुख हाकनं पुलांम्ह हे मनू हये मजिउगु प्रावधान दु धासें राष्ट्रपति कार्यालयं सरकारयात सुझाव बिउगु खः । थ्व सम्बन्धी संवैधानिक प्रावधान छु दु धइगु खँ नं राष्ट्रपति कार्यालयं हे सरकारयात स्मरण याकूगु खँ नं सीदुगु दु ।