अप्वः उत्साहित मजुइत व आँटे मजुइत इनाप

येँ – नेकपा (एमाले) व नेकपा (माओवादी केन्द्र) एकीकरण लिपा तःधंगु नेपाल कम्युनिष्ट पार्टी निर्माण जुइधुंकाः आः आन्तरिक व्यवस्थापन यायेगु ज्या न्ह्याकूगु दु । एमालेया मू ज्याकूयात हे एकीकृत पार्टीया नं मू ज्याकू दयेकूगु दुसा माओवादीया मू ज्याकूयात एकीकृत पार्टीया जनवर्गीय संगठनतय् ज्याकू दयेकूगु दु ।

पार्टी एकीकृत जुयाः तःधं जुइधुंकाः उकियापाखें थीथी विकृति वयेफुगु खँय् निम्हं अध्यक्षपिंसं थः कार्यकर्तातय्त सचेत यानादीगु दु । म्हिगः जूगु संसदीय दलया बैठकय् न्ववासें अध्यक्ष पुष्पकमल दाहालं पार्टी तःधं जुल धकाः सांसदत ‘ओभर कन्फिडेन्ट’ मजुइत निर्देशन बियादिल ।

वय्कलं उकुन्हु पार्टी एकता कार्यक्रमय् नं विश्वया आपालं थासय् शक्तिशाली जुइधुंकूपिं नेतात लिपा तानाशाही जुयाः पिहां वःगु व लिपा उमित जनतां हे ज्वनाः स्याये माःगु तकया अवस्था पिहां वःगु प्रशंग कनादीगु खः । अथे हे म्हिगः नेकपा संसदीय दलया नेता निर्वाचित जुयादीम्ह प्रधानमन्त्री केपी ओलीं थःपिनि पार्टी तःधं जूसां सुं नं आँटे चायेम्वाः धकाः विपक्षी नेपाली कांग्रेसयात इनाप यानादिल ।

कांग्रेसं थ्व पार्टी तःधं जुइधुंकल कि थ्वं विश्वया मेमेपिं कम्युनिष्ट पार्टीतय्सं थें अधिनायकवादी चरित्र क्यना हयेफु धकाः ख्याच्वः बीगु यानाच्वंगु दु । प्रधानमन्त्री ओलीं थःपिं अन अधिनायकवादी जुइ मखु धासें समृद्धिया लँय् कांग्रेस नं नापं वनेत आह्वान यानादीगु दु ।